തെലുങ്ക് സിനിമാ ലോകത്ത് ഏറ്റവും കൂടുതൽ ട്രോൾ ചെയ്യപ്പെടുന്ന നടനാണ് ബാലയ്യ. പൊതുവേദികളിൽ ആരാധകരോടും മറ്റും ദേഷ്യത്തോടെ പെരുമാറുന്നതാണ് ഇതിന് കാരണം. മുമ്പൊരിക്കൽ ബാലയ്യ ഒരാളുടെ മുഖത്ത് അടിക്കുന്ന വീഡിയോ വ്യാപകമായി പ്രചരിച്ചിരുന്നു.
ഇതിന് ശേഷം അമ്മാവൻ എന്ന് വിളിച്ചതിന് യുവ താരത്തോട് ദേഷ്യപ്പെട്ട സംഭവം, എആർ റഹ്മാനെ അറിയില്ലെന്ന് പറഞ്ഞത് തുടങ്ങി പല വിധ കാരണങ്ങൾ നടനെതിരെ പരിഹാസവും കുറ്റപ്പെടുത്തലും ഉയരാൻ കാരണമാക്കി. സിനിമകളിലെ അതി നാടകീയത നിറഞ്ഞ അമാനുഷിക ആക്ഷൻ രംഗങ്ങളും ബാലയയ്യെ ട്രോൾ ഗ്രൂപ്പുകളിലെ നായക നടനാക്കി.
എന്നാൽ ഇത്തരം വിമർശനങ്ങളും ആക്ഷേപങ്ങളും ഒന്നും ബാലയ്യ കാര്യമാക്കാറില്ല. ബാലയ്യയുടെ പുതിയ സിനിമ ആയ വീര സിംഹയുടെ ചിത്രീകരണം പൂർത്തിയായി. ഇനി അടുത്തതായി സംവിധായകൻ അനിൽ രവിപുഡിയുടെ സിനിമ ചെയ്യാനിരിക്കുകയാണ് നടനെന്നാണ് റിപ്പോർട്ട്. ചിത്രത്തിലേക്ക് നായികയെ ഇതുവരെ തീരുമാനിച്ചിട്ടില്ല.
തെലുങ്ക് മാധ്യമങ്ങളുടെ റിപ്പോർട്ട് പ്രകാരം ബോളിവുഡ് നടി സോനാക്ഷി സിൻഹയെ സിനിമയിലെ നായികയാക്കാൻ നിർമാതാക്കൾ താൽപര്യപ്പെടുന്നുണ്ട്. സിനിമയുടെ കഥയുമായി നടിയെ സമീപിച്ചെന്നാണ് റിപ്പോർട്ടുകൾ. പാൻ ഇന്ത്യൻ തലത്തിൽ ഈ സിനിമ ഒരുക്കാനാണ് അനിൽ രവിപുഡി താൽപര്യപ്പെടുന്നത്.
നേരത്തെ തെലുങ്കിലെ മറ്റൊരു സൂപ്പർ സ്റ്റാർ ആയ ചിരഞ്ജീവിയുടെ നായിക ആവാൻ സോനാക്ഷി സിൻഹയ്ക്ക് ഓഫർ വന്നിരുന്നു. എന്നാൽ നടി 3.5 കോടി രൂപ പ്രതിഫലം ആയി ആവശ്യപ്പെട്ടതിനെ തുടർന്ന് ഈ ഓഫർ പിൻവലിക്കുകയായിരുന്നത്രെ.
ബോളിവുഡിലെ മുൻനിര നായിക നടിമാരിൽ ഒരാളായിരുന്ന സോനാക്ഷി ഇപ്പോൾ ഹിന്ദി സിനിമകളിൽ പഴയത് പോലെ സജീവമല്ല. വാരി വലിച്ച് സിനിമ ചെയ്യേണ്ടെന്ന തീരുമാനത്തിലാണത്രെ നടി. ലിങ്ക എന്ന തമിഴ് സിനിമയിൽ നേരത്തെ സോനാക്ഷി അഭിനയിച്ചിട്ടുണ്ട്.
രജിനീകാന്ത് ആയിരുന്നു സിനിമയിലെ നായകൻ. അതിന് ശേഷം ഇതുവരെ ഒരു തെന്നിന്ത്യൻ സിനിമയിലും സോനാക്ഷി നായിക ആയിട്ടില്ല. സൽമാൻ ഖാൻ ചിത്രം ദബാംഗിലൂടെ ആണ് സോനാക്ഷി അഭിനയ രംഗത്തേക്ക് എത്തുന്നത്. പിന്നീട് സൺ ഓഫ് സർദാർ, റൗഡി റാത്തോർ, അകിര, കലങ്ക്, ലിങ്ക, ലൂട്ടേര തുടങ്ങിയ സിനിമകളിൽ സോനാക്ഷി സിൻഹ അഭിനയിച്ചു.