‘ഭക്ഷണം കഴിക്കാൻ കൂട്ടാക്കിയില്ല…’; ശോഭയെ കൈകളിൽ എടുത്തുകൊണ്ട് വന്ന് അഖിൽ മാരാർ!

ബി​ഗ് ബോസ് മലയാളം സീസൺ ഫൈവിലെ ശക്തരായ രണ്ട് മത്സരാർഥികളാണ് അഖിൽ മാരാരും ശോഭ വിശ്വനാഥും. ഇരുവരും തമ്മിൽ സ്നേഹത്തിൽ സംസാരിക്കുന്ന ഒരു രം​ഗം പോലും പ്രേക്ഷകന് കാണാൻ സാധിക്കില്ല. രണ്ടുപേരും രണ്ട് ധ്രുവങ്ങളിൽ നിൽക്കുന്നവരായതുകൊണ്ട് തന്നെ നേരിൽ കണ്ടാൽ വാക്ക് തർക്കവും അടിയുമാണ്. പ്രേക്ഷകർ ഇവരെ ടോം ആന്റ് ജെറി കോമ്പോ എന്നാണ് വിശേഷിപ്പിക്കാറുള്ളത്. കഴിഞ്ഞ ദിവസം വയറ് സംബന്ധമായ അസുഖങ്ങളെ തുടർന്ന് ആശുപത്രിയിലേക്ക് വിദ​ഗ്ദ ചികിത്സയ്ക്കായി അഖിലിനെ മാറ്റിയിരുന്നു. എല്ലാവിധ ഭക്ഷണവും അഖിൽ കഴിക്കാറില്ല. അതുകൊണ്ട് തന്നെ ആരോ​ഗ്യസ്ഥിതി വളരെ മോശമായിരുന്നു. ആശുപത്രിയിലേക്ക് അഖിലിനെ മാറ്റിയെന്ന് ബി​ഗ് ബോസ് അറിയിച്ച ശേഷം ശോഭ വിശ്വനാഥ് പറഞ്ഞ വാക്കുകൾ വൈറലായിരുന്നു. അതുവഴി അഖിലിനെ സ്വന്തം നാടായ കൊല്ലത്തേക്ക് പാക്ക് ചെയ്യാൻ വഴിയുണ്ടോയെന്നാണ് ശോഭ ബി​ഗ് ബോസിനോട് ചോദിച്ചത്.

അസുഖം മൂലം ആശുപത്രിയിലേക്ക് മാറ്റിയൊരാളെ കുറിച്ച് ശോഭ ഇത്തരത്തിൽ പറഞ്ഞത് വളരെ ക്രൂരമായിപോയി എന്നാണ് പിന്നീട് പ്രേക്ഷകരിൽ ഭൂരിഭാ​ഗവും ശോഭയെ വിമർശിച്ച് ​കുറിച്ചത്.