മാസ്റ്റേഴ്സ് ലീഗിൽ വെടിക്കെട്ട് ബാറ്റിങ്ങുമായി സച്ചിന്റെ അഴിഞ്ഞാട്ടം, ഓസീസിനെ അടിച്ചു തകർത്തു; ഇന്ത്യ പക്ഷേ തോറ്റു

നേരത്തെ മത്സരത്തിൽ ടോസ് നേടിയ ഇന്ത്യ മാസ്റ്റേഴ്സ്, ആദ്യം ബൗൾ ചെയ്യാൻ തീരുമാനിക്കുകയായിരുന്നു. സ്കോർ ബോർഡിൽ 33 റൺസെത്തിയപ്പോൾ ഓസ്ട്രേലിയക്ക് ആദ്യ വിക്കറ്റ് നഷ്ടമായി. 15 പന്തിൽ 22 റൺസെടുത്ത ഷോൺ മാർഷാണ് പുറത്തായത്. എന്നാൽ ഇതിന് ശേഷം ഷെയ്ൻ വാട്സണും ബെൻ ഡങ്കും ഒത്തുചേർന്നതോടെ ഓസ്ട്രേലിയ കളിയിലെ നിയന്ത്രണം ഏറ്റെടുത്തു. ഇരു താരങ്ങളും മത്സരിച്ച് ആക്രമിച്ചതോടെ ഓസ്ട്രേലിയൻ സ്കോർ റോക്കറ്റ് വേഗത്തിൽ കുതിച്ചുകയറി.

Also Read: സെമിക്ക് ശേഷം അക്കാര്യം തുറന്ന് പറഞ്ഞ് വിരാട് കോഹ്ലി; ഇന്ത്യൻ താരത്തിന് ഏറ്റവും കൂടുതൽ അഭിമാനം നൽകുന്ന കാര്യം ഇങ്ങനെ

രണ്ട് താരങ്ങളും സെഞ്ചുറി നേടി പുറത്താകാതെ നിന്നതോടെ നിശ്ചിത 20 ഓവറിൽ 269/1 എന്ന പടുകൂറ്റൻ സ്കോറാണ് ഓസ്ട്രേലിയ മാസ്റ്റേഴ്സ് നേടിയത്. ഷെയ്ൻ വാട്സൺ 52 പന്തുകളിൽ 12 ഫോറുകളും ഏഴ് സിക്സറുകളുമടക്കം 110 റൺസ് നേടിയും, ബെൻ ഡങ്ക് 53 പന്തിൽ 12 ഫോറുകളും 10 സിക്സറുകളുമടക്കം 132 റൺസ് നേടിയും പുറത്താകാതെ നിന്നു.

പടുകൂറ്റൻ വിജയലക്ഷ്യം പിന്തുടർന്ന ഇന്ത്യക്ക് വേണ്ടി സച്ചിൻ ടെണ്ടുൽക്കറും നമൻ ഓജയും ചേർന്നാണ് ബാറ്റിങ് ഓപ്പൺ ചെയ്തത്. മിന്നും ഫോമിലായിരുന്ന സച്ചിൻ ഓസീസ് ബൗളർമാർക്കെതിരെ കടന്നാക്രമണം നടത്തി. എന്നാൽ മറുവശത്ത് നിന്ന് സച്ചിന് പിന്തുണ ലഭിച്ചില്ല. ഓജ 19 റൺസും, സൗരഭ് തിവാരി ഒരു റൺസും, ഇർഫാൻ പത്താൻ 11 റൺസുമെടുത്ത് പുറത്തായി. ടീം സ്കോർ 100 ലെത്തിയപ്പോൾ സച്ചിനും വീണു. വെറും 33 പന്തുകളിൽ ഏഴ് ഫോറുകളും നാല് സിക്സറുകളുമടക്കം 64 റൺസായിരുന്നു സച്ചിൻ നേടിയത്.

Also Read: ചാമ്പ്യൻസ് ട്രോഫി സെമിയിൽ ഇന്ത്യ ജയിച്ചതോടെ ഏറ്റവും വലിയ പണി കിട്ടിയത് പാകിസ്താന്; പിന്നിൽ ഈ കാരണം

യൂസഫ് പത്താൻ 25 റൺസിലും, പവൻ നേഗി 14 റൺസിലും, സ്റ്റുവാർട്ട് ബിന്നി രണ്ട് റൺസിലും പുറത്തായി. സ്പിന്നർ സേവ്യർ ദോഹർത്തി അഞ്ച് വിക്കറ്റുകൾ നേടി തിളങ്ങിയതോടെ ഇന്ത്യ 20 ഓവറിൽ 174 റൺസിന് ഓളൗട്ടായി.