വെടിക്കെട്ട് നടത്തി സച്ചിനും യുവിയും, ബൗളിങ്ങിൽ നദീം മാജിക്ക്; ഇന്ത്യ ഫൈനലിൽ

റായ്പൂരിൽ നടന്ന മത്സരത്തിൽ ടോസ് നേടിയ ഓസ്ട്രേലിയ മാസ്റ്റേഴ്സ്, ഇന്ത്യയെ ബാറ്റിങ്ങിന് അയക്കുകയായിരുന്നു. അഞ്ച് റൺസെടുത്ത അമ്പാട്ടി റായുഡുവിന്റെ വിക്കറ്റ് ഇന്ത്യക്ക് വേഗം നഷ്ടമായെങ്കിലും മികച്ച ഫോമിലുള്ള ക്യാപ്റ്റൻ സച്ചിൻ ടെണ്ടുൽക്കർ ടീം സ്കോറിനെ മുന്നോട്ട് നയിച്ചു. 30 പന്തിൽ ഏഴ് ഫോറുകളുടെ സഹായത്തോടെ 42 റൺസാണ്‌ സച്ചിൻ നേടിയത്.

Also Read: ഇന്ത്യയുടെ ആ നീക്കം വൻ വിജയം, ചാമ്പ്യൻസ് ട്രോഫിയിൽ കെഎൽ രാഹുൽ തകർത്തത് കോഹ്ലിയുടെ കിടിലൻ റെക്കോഡ്

നാലാം നമ്പരിൽ കളിച്ച യുവരാജ് സിങ്ങും വെടിക്കെട്ട് ബാറ്റിങ്ങാണ് കാഴ്ച വെച്ചത്. 30 പന്തിൽ ഒരു ഫോറിന്റെയും ഏഴ് സിക്സറുകളുടെയും സഹായത്തോടെ 59 റൺസാണ് യുവി നേടിയത്. സ്റ്റുവാർട്ട് ബിന്നി 21 പന്തിൽ 36 റൺസും, യൂസഫ് പത്താൻ 10 പന്തിൽ 23 റൺസും, ഇർഫാൻ പത്താൻ ഏഴ് പന്തിൽ 19 റൺസും നേടി തിളങ്ങിയതോടെ ഇന്ത്യ 20 ഓവറിൽ 220/7 എന്ന പടുകൂറ്റൻ സ്കോറിലെത്തി.

221 റൺസ് വിജയലക്ഷ്യം പിന്തുടർന്ന ഓസ്ട്രേലിയക്ക് അഞ്ച് റൺസെടുത്ത ക്യാപ്റ്റൻ ഷെയ്ൻ വാട്സണിന്റെ വിക്കറ്റ് പെട്ടെന്ന് നഷ്ടമായി‌. രണ്ടാം വിക്കറ്റിൽ ഷോൺ മാർഷും ബെൻ ഡങ്കും ചേർന്ന് തകർത്തടിക്കുമ്പോളാണ് 21 റൺസെടുത്ത മാർഷ് വീഴുന്നത്. ഇതോടെ തുടങ്ങി ഓസ്ട്രേലിയയുടെ തകർച്ച. പിന്നീട് തുടർച്ചയായ ഇടവേളകളിൽ വിക്കറ്റുകൾ നഷ്ടമായ അവർ 18.1 ഓവറുകളിൽ 126 റൺസിന് ഓളൗട്ടാവുകയായിരുന്നു. 39 റൺസ് നേടിയ ബെൻ കട്ടിങ്ങാണ് ഓസീസ് ടോപ് സ്കോറർ.

Also Read: 2027 ലോകകപ്പ് വരെ കളിക്കാൻ സ്പെഷ്യൽ പ്ലാനുമായി രോഹിത് ശർമ; അഭിഷേക് നായരിന്റെ സഹായം നിർണായകമാകും

ഇടം കൈയ്യൻ സ്പിന്നർ ഷഹബാസ് നദീമാണ് ഓസ്ട്രേലിയയെ തകർത്തത്. നാല് ഓവറുകളിൽ 15 റൺസ് മാത്രം വിട്ടുകൊടുത്ത് നാല് വിക്കറ്റുകൾ താരം വീഴ്ത്തി. വിനയ് കുമാർ, ഇർഫാൻ പത്താൻ എ‌ന്നിവർ രണ്ട് വിക്കറ്റുകൾ വീതവും നേടി.