ഐപിഎല്‍ മേധാവിത്വത്തിന് വെല്ലുവിളി ഉയര്‍ത്തി ഗ്ലോബല്‍ ടി20 ലീഗ് വരുന്നു. സൗദി അറേബ്യയുടെ എസ്ആര്‍ജെ സ്പോര്‍ട്സ് ഇന്‍വെസ്റ്റ്മെന്റ്സ് ആയിരിക്കും പ്രധാന നിക്ഷേപകര്‍. 500 മില്യണ്‍ യുഎസ് ഡോളര്‍ ആണ് ടി20 ലീഗിലെ നിക്ഷേപം.
ഹൈലൈറ്റ്:
- ടെന്നീസ് ഗ്രാന്‍ഡ് സ്ലാം മാതൃകയില്‍ ടി20 ലീഗ്
- നിക്ഷേപകര്‍ സൗദിയിലെ എസ്ആര്‍ജെ സ്പോര്‍ട്സ്
- പിന്നില്‍ ഓസ്ട്രേലിയന്‍ ക്രിക്കറ്റേഴ്സ് അസോസിയേഷന്‍
ഐപിഎല്ലിന് ഭീഷണി? ഗ്ലോബല്‍ ടി20 ലീഗുമായി സൗദി അറേബ്യ; ക്രിക്കറ്റ് ഗ്രാന്‍ഡ് സ്ലാമിനായി 500 മില്യണ്‍ ഡോളര്‍ നിക്ഷേപം
സൗദി അറേബ്യയുടെ എസ്ആര്‍ജെ സ്പോര്‍ട്സ് ഇന്‍വെസ്റ്റ്മെന്റ്സ് ആയിരിക്കും ക്രിക്കറ്റ് ഗ്രാന്‍ഡ് സ്ലാമിന്റെ പ്രധാന നിക്ഷേപകര്‍. മുന്‍ ഓസ്ട്രേലിയന്‍ പ്രൊഫഷണല്‍ ലീഗ്‌സ് സോക്കര്‍ ചീഫ് എക്സിക്യൂട്ടീവ് ഡാനി ടൗണ്‍സെന്‍ഡ് ആണ് എസ്ആര്‍ജെയുടെ മേധാവി.
ഓസ്ട്രേലിയന്‍ ക്രിക്കറ്റേഴ്സ് അസോസിയേഷന്‍, ക്രിക്കറ്റ് എന്‍എസ്ഡബ്ല്യു എന്നിവയുടെ ബോര്‍ഡ് അംഗമായിരുന്ന നീല്‍ മാക്സ്വെല്ലിന്റെതാണ് ക്രിക്കറ്റ് ഗ്രാന്‍ഡ് സ്ലാം എന്ന ആശയം. മുന്‍ എന്‍എസ്ഡബ്ല്യു, വിക്ടോറിയ ഓള്‍റൗണ്ടര്‍ കൂടിയാണ് നീല്‍ മാക്സ്വെല്‍.
പുതിയ നിയമവുമായി ബിസിസിഐ; ഐപിഎല്‍ ടീമുകള്‍ക്ക് ഒരു മത്സരത്തിന് വേണ്ടിയും താരങ്ങളുമായി കരാറൊപ്പിടാം
ഓസ്ട്രേലിയന്‍ ക്രിക്കറ്റേഴ്സ് അസോസിയേഷനാണ് ഈ ആശയവുമായി മുന്നോട്ടുവരുന്നത്. നിലവിലുള്ള കളിക്കാരെയും മുന്‍ കളിക്കാരെയും പ്രതിനിധീകരിക്കുന്നതാണ് അസോസിയേഷന്‍. ടെസ്റ്റ് ക്രിക്കറ്റ് സംരക്ഷിക്കുക, വെസ്റ്റ് ഇന്‍ഡീസ് പോലുള്ള ദുര്‍ബലമായ ബോര്‍ഡുകളെ പിന്തുണയ്ക്കുക തുടങ്ങിയ ആവശ്യങ്ങള്‍ക്ക് വരുമാനം കണ്ടെത്തുകയാണ് ടി20 ലീഗിന്റെ ലക്ഷ്യം.
ക്രിക്കറ്റ് ഗ്രാന്‍ഡ് സ്ലാം എന്ന രീതിയില്‍ ആവിഷ്‌കരിക്കുന്ന ടി20 ലീഗിനെക്കുറിച്ച് ബന്ധപ്പെട്ട ആരില്‍ നിന്നും ഔദ്യോഗിക പ്രസ്താവനകളൊന്നും ഇതുവരെ ഉണ്ടായിട്ടില്ല. എന്നാല്‍, പുറത്തുവരുന്ന റിപോര്‍ട്ടുകള്‍ പ്രകാരം ഒരു രാജ്യങ്ങളിലെയും ടി20 ലീഗുമായി മല്‍സരിക്കാത്ത രീതിയില്‍ ആവിഷ്‌കരിക്കാനാണ് നീക്കം.
‘സിക്‌സറുകള്‍ പറത്തുകയാണവന്‍, ഇന്ത്യന്‍ ടീമിലെത്തും…’ റോയല്‍സിലെ 13കാരനെ കുറിച്ച് സഞ്ജു സാംസണ്‍
ക്രിക്കറ്റ് ലീഗിലെ ഫ്രാഞ്ചൈസികള്‍ ഓസ്ട്രേലിയയില്‍ നിന്നും സൗദി അറേബ്യയില്‍ നിന്നുമുള്ള ടീമുകള്‍ ആയിരിക്കും. ലീഗില്‍ പുരുഷ, വനിതാ മത്സരങ്ങള്‍ ഉണ്ടായിരിക്കും. ഫൈനല്‍ സൗദി അറേബ്യയില്‍ ആയിരിക്കും അരങ്ങേറുക.
ഓസ്ട്രേലിയന്‍ ക്രിക്കറ്റ് ബോര്‍ഡിന്റെയും ഐസിസിയുടെയും അനുമതി ഇതിന് ആവശ്യമാണ്. അതുകൊണ്ട് തന്നെ ലീഗിന്റെ മുന്നോട്ടുള്ള പാത എളുപ്പമായിരിക്കില്ല. ഐസിസി ചെയര്‍മാന്‍ ജയ് ഷായുടെ തീരുമാനമായിരിക്കും നിര്‍ണായകമാവുകയെന്നും റിപോര്‍ട്ടില്‍ പറയുന്നു.
ഇന്ത്യന്‍ കളിക്കാര്‍ക്ക് മറ്റ് ടി20 ലീഗുകളില്‍ കളിക്കാന്‍ നിലവില്‍ അനുവാദമില്ല. ഐപിഎല്ലിന്റെ പ്രാധാന്യം നിലനിര്‍ത്താന്‍ വേണ്ടിയാണിത്. ഇന്ത്യന്‍ താരങ്ങളെ പുതിയ ലീഗിലേക്ക് അയക്കാന്‍ ബിസിസിഐയുടെ അനുമതി ആവശ്യമായി വരും. ഐപിഎല്ലിന് ഭീഷണി ആവാത്ത വിധത്തിലുള്ള ക്രിക്കറ്റ് ഗ്രാന്‍ഡ് സ്ലാം ആണിതെന്ന് ബോധ്യപ്പെടുത്തുന്നത് പോലുള്ള മറ്റ് വെല്ലുവിളികളും ഉണ്ടായേക്കാം.
രചയിതാവിനെക്കുറിച്ച്നിഷാദ് അമീന്‍16 വര്‍ഷമായി മാധ്യമരംഗത്ത് പ്രവര്‍ത്തിക്കുന്നു. കാലിക്കറ്റ് സര്‍വകലാശാലയില്‍ നിന്ന് മാസ് കമ്മ്യൂണിക്കേഷനില്‍ ബിരുദവും കാലിക്കറ്റ് പ്രസ് ക്ലബ്ബില്‍ നിന്ന് ടെലിവിഷന്‍ ജേണലിസത്തില്‍ പിജി ഡിപ്ലോമയും ഇംഗ്ലീഷ് സാഹിത്യത്തില്‍ ബിരുദാനന്തര ബിരുദവും നേടി. ഏഴ് വര്‍ഷം സൗദി അറേബ്യയില്‍ മാധ്യമപ്രവര്‍ത്തകനായിരുന്നു. സൗദിയില്‍ ഇന്ത്യന്‍ മീഡിയ ഫോറത്തിന്റെ ജനറല്‍ സെക്രട്ടറിയായും പ്രവര്‍ത്തിച്ചിട്ടുണ്ട്. സുപ്രഭാതം, മലയാളം ന്യൂസ്, തേജസ് ദിനപത്രങ്ങളില്‍ സീനിയര്‍ സബ് എഡിറ്ററായും ഗള്‍ഫ് ന്യൂസ് എഡിറ്ററായും സീനിയര്‍ റിപോര്‍ട്ടറായും കേരളത്തിലെയും ഗള്‍ഫിലെയും വിവിധ ബ്യൂറോകളിലും എഡിറ്റോറിയല്‍ ഡെസ്‌കിലും ന്യൂഡല്‍ഹി, റിയാദ്, ജിദ്ദ, യുഎഇ എന്നിവിടങ്ങളിലും ജോലിചെയ്തു. ടൈംസ് ഓഫ് ഇന്ത്യയുടെ ഭാഗമായ സമയം മലയാളത്തില്‍ കണ്ടന്റ് പ്രൊഡ്യൂസറാണ്.… കൂടുതൽ വായിക്കുക