ബാറ്റിങ്ങിലെ വെടിക്കെട്ട് റെക്കോഡ് സ്വന്തമാക്കി അഭിഷേക് ശർമ, ഐപിഎല്ലിൽ ഇതാദ്യം; ആക്രമണ ബാറ്റിങ്ങ് സമ്മാനിച്ച നേട്ടം ഇങ്ങനെ

അതേ സമയം സൺ റൈസേഴ്സ് ഹൈദരാബാദിന്റെ ഓപ്പണറായ അഭിഷേക് ശർമ ഒരു കിടിലൻ റെക്കോഡുമായാണ് 2025 സീസൺ ഐപിഎൽ അവസാനിപ്പിക്കുന്നത്. തുടർച്ചയായ ര‌ണ്ട് ഐപിഎൽ സീസണുകളിൽ 190 ന് മുകളിൽ സ്ട്രൈക്ക് റേറ്റിൽ 400 റൺസ് നേടുന്ന ആദ്യ ബാറ്ററെന്ന റെക്കോഡാണ് ഇപ്പോൾ അഭിഷേകിന് സ്വന്തമായിരിക്കുന്നത്.

കെകെആറിന് എതിരായ കളിയിൽ 16 പന്തുകളിൽ 32 റൺസായിരുന്നു അഭിഷേക് ശർമയുടെ സമ്പാദ്യം. ഈ സീസണിൽ താരം നേടിയതാകട്ടെ 14 കളികളിൽ നിന്ന് 439 റൺസ്. അതും 193.39 സ്ട്രൈക്ക് റേറ്റിൽ. 2024 സീസണിലും മികച്ച പ്രകടനം കാഴ്ച വെച്ച ഈ യുവ ഓപ്പണർ 16 കളികളിൽ 204.22 സ്ട്രൈക്ക് റേറ്റിൽ 484 റൺസ് സ്കോർ ചെയ്തിരുന്നു.

Also Read: സണ്‍റൈസേഴ്‌സിനോട് 110 റണ്‍സിന് കെകെആര്‍ കീഴടങ്ങി. കെകെആറിന്റെ ഏറ്റവും വലിയ തോല്‍വി

ഇത് മൂന്നാമത്തെ ഐപിഎൽ സീസണിലാണ് അഭിഷേക് ശർമ 400 റൺസിന് മുകളിൽ സ്കോർ ചെയ്യുന്നത്. 2022 ലായിരുന്നു ആദ്യം. 14 കളികളിൽ നിന്ന് 426 റൺസായിരുന്നു അഭിഷേക് ശർമ അന്ന് നേടിയത്.

ഈ വർഷമാണ് അഭിഷേക് ശർമ ഐപിഎൽ കരിയറിലെ തന്റെ ആദ്യ സെഞ്ചുറി നേടിയത്. പഞ്ചാബ് കിങ്സിന് എതിരെ 141 റൺസായിരുന്നു ഈ വെടിക്കെട്ട് ഓപ്പണർ സ്കോർ ചെയ്തത്. ഐപിഎല്ലിൽ ഒരിന്ത്യൻ താരത്തിന്റെ എക്കാലത്തെയും ഉയർന്ന സ്കോറും ഐപിഎല്ലിൽ ചേസിങ്ങിൽ ഒരു താരം നേടുന്ന ഉയർന്ന സ്കോറുമാണ് ഇത്.

Also Read: അഭിഷേക് പോക്കറ്റിൽ നിന്നെടുത്ത പേപ്പറിൽ എഴുതിയിരുന്നത് ഇങ്ങനെ, ആ സ്പെഷ്യൽ ആഘോഷത്തിന് പിന്നിലെ‌ രഹസ്യം.

അതേ സമയം ടി20 ക്രിക്കറ്റിൽ മൊത്തം ഏഴ് സെഞ്ചുറികളാണ് അഭിഷേക് ശർമ നേടിയിട്ടുള്ളത്. ടി20 ക്രിക്കറ്റിൽ കൂടുതൽ സെഞ്ചുറികൾ നേടിയ ഇന്ത്യക്കാരിൽ വിരാട് കോഹ്ലിക്കും, രോഹിത് ശർമക്കും പിന്നിൽ മൂന്നാമതാണ് അദ്ദേഹം. അഭിഷേക് ശർമ നേടിയ ടി20 സെഞ്ചുറികളിൽ രണ്ടെ‌ണ്ണം പിറന്നത് ഇന്ത്യക്കായി കളിക്കുമ്പോളാണ്‌. ടി20 യിൽ ഏഴ് സെഞ്ചുറികൾ നേടുന്ന ഏറ്റവും പ്രായം കുറഞ്ഞ താരവും അഭിഷേകാണ്.