ലോക ടെസ്റ്റ് ചാമ്പ്യൻഷിപ്പിൽ ( WTC ) കിരീടം ചൂടിയിരിക്കുകയാണ് ദക്ഷിണാഫ്രിക്ക. ഫൈനലിലെ ജയത്തിന് മുൻപ് ദക്ഷിണാഫ്രിക്കയുടെ ഡ്രെസ്സിങ് റൂമിൽ നടന്നത് ഇങ്ങനെ.
ഹൈലൈറ്റ്:
- ലോക ടെസ്റ്റ് ചാമ്പ്യൻഷിപ്പ് കിരീടം ദക്ഷിണാഫ്രിക്കക്ക്
- ഫൈനലിൽ ഓസ്ട്രേലിയയെ വീഴ്ത്തി
- ദക്ഷിണാഫ്രിക്കയുടെ ഡ്രെസ്സിങ് റൂമിൽ നടന്നത് ഇങ്ങനെ
ജയത്തിന് മുൻപ് ദക്ഷിണാഫ്രിക്കൻ ഡ്രെസ്സിങ് റൂമിൽ നടന്നത് ഇങ്ങനെ; കസേരയിൽ നിന്ന് എണീക്കാതെ ബാവുമ, പ്രാർഥനയുമായി ജാൻസൻ
മത്സരത്തിൽ ഓസ്ട്രേലിയ ഉയർത്തിയ 282 റൺസ് വിജയലക്ഷ്യം പിന്തുടർന്ന ദക്ഷിണാഫ്രിക്കക്ക് നാലാം ദിവസത്തിന്റെ തുടക്കത്തിൽ തന്നെ ടെംബ ബാവുമയുടെ വിക്കറ്റ് നഷ്ടമായിരുന്നു. 66 റൺസെടുത്ത് മികച്ച ഫോമിൽ ബാറ്റ് ചെയ്ത് വരുമ്പോളാണ് ബാവുമ പുറത്താകുന്നത്.
ഔട്ടായി ഡ്രെസ്സിങ് റൂമിലെത്തിയ താരം ബാൽക്കണിയിലെ ഒരു കസേരയിൽ ഇരിപ്പുറപ്പിച്ചു. ഇതിന് ശേഷം അദ്ദേഹം ഒരുതവണ പോലും കസേരയിൽ നിന്ന് എഴുന്നേറ്റില്ല. ഒരു ക്രിക്കറ്റ് അന്ധവിശ്വാസത്തിന്റെ ഭാഗമായിട്ടായിരുന്നു ഇത്. ഫൈനൽ ജയത്തിന് മുൻപ് ദക്ഷിണാഫ്രിക്കയുടെ ഡ്രെസ്സിങ് റൂമിൽ പലരും പ്രാർഥനയിലായിരുന്നുവെന്ന് കളിക്ക് ശേഷം താരങ്ങൾ തന്നെ വെളിപ്പെടുത്തി.
“ഡ്രെസ്സിങ് റൂമിനുള്ളിലെ രക്തസമ്മർദ്ദം വളരെ കൂടുതലായിരുന്നു. കിരീടം നേടാൻ സാധിച്ചതിൽ ഞങ്ങൾക്ക് വളരെയധികം അഭിമാനമുണ്ട്.” ലോക ടെസ്റ്റ് ചാമ്പ്യൻഷിപ്പ് ഫൈനലിന് ശേഷം ദക്ഷിണാഫ്രിക്കൻ പേസർ ലുങ്കി എംഗിഡി പറഞ്ഞു.
” അവിടെ ( ഡ്രെസ്സിങ് റൂമിൽ ) ഇരുന്ന് പ്രാർഥിക്കുകയായിരുന്നു. ഞങ്ങൾക്ക് ഞങ്ങളുടെ ജോലി പൂർത്തിയാക്കാൻ സാധിച്ചു. വിജയിച്ചതിൽ ഏറെ സന്തോഷമുണ്ട്. ചേഞ്ച് റൂമിൽ വലിയ ആശങ്കകൾ നിലനിന്നിരുന്നു. ഞാൻ അടക്കം പലരും അവിടെ നിശബ്ദരായിരുന്നു.” ഫൈനൽ ജയത്തിന് ശേഷം ദക്ഷിണാഫ്രിക്കൻ സൂപ്പർ താരം മാർക്കോ ജാൻസൻ വെളിപ്പെടുത്തി.
അതേ സമയം നീണ്ട 27 വർഷത്തെ ഇടവേളക്ക് ശേഷമാണ് ദക്ഷിണാഫ്രിക്ക ഒരു ഐസിസി കിരീടത്തിൽ മുത്തമിടുന്നത്. ടീമിന്റെ അവസാന ഐസിസി ട്രോഫി 1998 ലായിരുന്നു. അന്ന് ഐസിസി നോക്കൗട്ട് ട്രോഫിയിലാണ് ദക്ഷിണാഫ്രിക്ക മുത്തം വെച്ചത്. ഇതിന് ശേഷം ദക്ഷിണാഫ്രിക്കയുടെ പുരുഷ ടീം ഒരു ഐസിസി ഫൈനലിൽ കടന്നത് 2024 ലെ ടി20 ലോകകപ്പിലായിരുന്നു. എന്നാൽ ഇന്ത്യയോട് തോറ്റുമടങ്ങാനായിരുന്നു അന്ന് അവർക്ക് വിധി.
2023-25 ലോക ടെസ്റ്റ് ചാമ്പ്യൻഷിപ്പിൽ കിരീടം ചൂടിയ ദക്ഷിണാഫ്രിക്കക്ക് റെക്കോഡ് സമ്മാനത്തുകയാണ് ലഭിക്കുക. ഏകദേശം 30.78 കോടി ഇന്ത്യൻ രൂപയോളം വരുമിത്. ടെസ്റ്റ് ചാമ്പ്യൻഷിപ്പിന്റെ ചരിത്രത്തിൽ വിജയികളാകുന്ന ടീമിന് ലഭിക്കുന്ന എക്കാലത്തെയും ഉയർന്ന തുകയാണിത്.
രചയിതാവിനെക്കുറിച്ച്ഗോകുൽ എസ്ഗോകുൽ എസ്- സമയം മലയാളത്തിൽ ഡിജിറ്റൽ കണ്ടൻ്റ് പ്രൊഡ്യൂസർ. സ്പോർട്സ് ഇഷ്ട വിഷയം. ഇന്ത്യൻ സൂപ്പർ ലീഗ്, സന്തോഷ് ട്രോഫി അടക്കം വിവിധ ടൂർണമെന്റുകൾ റിപ്പോർട്ട് ചെയ്തിട്ടു‌ണ്ട്. 2017 മുതൽ മാധ്യമ പ്രവർത്തന രംഗത്ത് സജീവം. ഇടക്കാലത്ത് അധ്യാപകനായും ജോലി ചെയ്തു.… കൂടുതൽ വായിക്കുക