തിരുവനന്തപുരം
നേതൃത്വത്തിന്റെ ഏകപക്ഷീയ നീക്കങ്ങളിൽ പ്രതിഷേധിച്ച്‌ തലസ്ഥാനത്ത്‌ കോൺഗ്രസിൽ കൂട്ടരാജി. തിരുവനന്തപുരം ഡിസിസി ജനറൽ സെക്രട്ടറിമാരടക്കം നൂറിലധികം നേതാക്കളും പ്രവർത്തകരുമാണ്‌ കെപിസിസി പ്രസിഡന്റ്‌ കെ സുധാകരന്‌ രാജിക്കത്ത്‌ കൈമാറിയത്‌. ഡിസിസി ജനറൽ സെക്രട്ടറിമാരായ വാഴോട്ടുകോണം ചന്ദ്രശേഖരൻ, വി എൻ ഉദയകുമാർ, ഡിസിസി അംഗം വട്ടിയൂർക്കാവ്‌ ചന്ദ്രശേഖരൻ എന്നിവരുൾപ്പെടെ 104 പേരാണ്‌ രാജിക്കത്ത്‌ നൽകിയത്‌.
പാർടി പുനഃസംഘടനയിൽ നേതാക്കൾ ഏകപക്ഷീയ നീക്കങ്ങൾ നടത്തുന്നതായി ആരോപിച്ച്‌ വട്ടിയൂർക്കാവ്‌ ബ്ലോക്കിലെ നേതാക്കളാണ്‌ രാജിവച്ചത്‌. കെപിസിസി അംഗങ്ങളായ ടി സുദർശനെയും ശാസ്തമംഗലം മോഹനനെയും വട്ടിയൂർക്കാവിലെ പുനഃസംഘടനാ നടപടികൾക്ക് കെപിസിസി ചുമതലപ്പെടുത്തിയതാണ് പ്രകോപനത്തിന് കാരണം. സ്ഥിരമായി പാർടി സ്ഥാനാർഥിയെ പരാജയപ്പെടുത്താൻ ശ്രമിക്കുന്ന ഇരുവർക്കുമെതിരെ നടപടിയെടുക്കുന്നില്ല, ബ്ലോക്ക് പ്രസിഡന്റിനെ ഏകപക്ഷീയമായി മാറ്റി എന്നീ ആരോപണങ്ങളാണ്‌ ഇവർ ഉയർത്തുന്നത്‌.
വട്ടിയൂർക്കാവിൽ കോൺഗ്രസ്‌ സ്ഥാനാർഥി വീണാ നായർക്കെതിരെ പരസ്യമായി രംഗത്തുവന്ന സുദർശനനും ശാസ്തമംഗലം മോഹനനും പിന്നീട് സ്ഥാനാർഥിയെ തോൽപ്പിക്കാൻ ചരടുവലിച്ചതായി രാജിക്കത്തിൽ പറയുന്നു. തെരഞ്ഞെടുപ്പിൽ യുഡിഎഫ്‌ മൂന്നാംസ്ഥാനത്തായി. പിന്നീട് വീണയുടെ പോസ്റ്റർ ആക്രിക്കടയിൽ കണ്ടെത്തിയതിനു പിന്നിലും ഇവരാണ്. ഇതിനെതിരെ കെപിസിസിക്ക് പരാതി നൽകിയിട്ടും നടപടിയെടുത്തില്ലെന്നും കത്തിലുണ്ട്‌. അതേസമയം, പാർടിവിരുദ്ധ പ്രവർത്തനത്തിന്‌ വി എൻ ഉദയകുമാറിനെ സസ്‌പെൻഡ് ചെയ്തതായി കെപിസിസി ജനറൽ സെക്രട്ടറി അറിയിച്ചു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
മറ്റു വാർത്തകൾ