IND vs ENG Test Series: ഇംഗ്ലണ്ട് പരമ്പരയ്ക്ക് മുമ്പ് ഗൗതം ഗംഭീറിന്റെ (Guatam Gambhir) സപ്പോര്‍ട്ട് സ്റ്റാഫിനെ വെട്ടിക്കുറയ്ക്കാന്‍ ബിസിസിഐ തീരുമാനിച്ചതായി റിപോര്‍ട്ട്. അസിസ്റ്റന്റ് കോച്ച് അഭിഷേക് നായര്‍, ഫീല്‍ഡിങ് കോച്ച് ടി ദിലീപ് എന്നിവരെ പുറത്താക്കും.
ഹൈലൈറ്റ്:
- അഭിഷേക് നായരേയും ദിലീപിനേയും പുറത്താക്കും
- ഇംഗ്ലണ്ട് പര്യടനത്തിന് മുമ്പ് തീരുമാനമുണ്ടാവും
- അസിസ്റ്റന്റ് കോച്ച്, ഫീല്‍ഡിങ് കോച്ച് ഉണ്ടാവില്ല
ഗൗതം ഗംഭീറിന് പണിവരുന്നു; സപ്പോര്‍ട്ട് സ്റ്റാഫില്‍ നിന്ന് അഭിഷേക് നായര്‍, ടി ദിലീപ് എന്നിവരെ ഒഴിവാക്കുമെന്ന് റിപോര്‍ട്ട്
നാളെ (മാര്‍ച്ച് 29) ഗുവാഹത്തിയില്‍ ബിസിസിഐ ഉന്നതതല യോഗത്തില്‍ സപ്പോര്‍ട്ട് സ്റ്റാഫിന്റെ കാര്യത്തില്‍ അന്തിമ തീരുമാനമെടുക്കുമെന്ന് റിപ്പോര്‍ട്ട് വ്യക്തമാക്കുന്നു. ബിസിസിഐ സെക്രട്ടറി ദേവജിത് സൈകിയ, ചീഫ് സെലക്ടര്‍ അജിത് അഗാര്‍ക്കര്‍, ഹെഡ് കോച്ച് ഗൗതം ഗംഭീര്‍ എന്നിവര്‍ ഉന്നതതല യോഗത്തില്‍ പങ്കെടുക്കും.
രാജസ്ഥാന്‍ റോയല്‍സിന്റെ ഹോം മാച്ചിന് സാറാ അലി ഖാന്റെ നൃത്തം; റിയാന്‍ പരാഗിനെ ക്രൂരമായി ട്രോളി സോഷ്യല്‍ മീഡിയ
കഴിഞ്ഞ ടി20 ലോകകപ്പ് വിജയത്തിനുശേഷം രാഹുല്‍ ദ്രാവിഡ് വിരമിച്ചതോടെയാണ് മുഖ്യ പരിശീലകനായി ഗംഭീര്‍ സ്ഥാനമേറ്റത്. ചരിത്രത്തില്‍ ആദ്യമായി രണ്ട് അസിസ്റ്റന്റ് പരിശീലകരെയും ഒരു ബൗളിങ് പരിശീലകനെയും ഗംഭീര്‍ ഉള്‍പ്പെടുത്തി. റയാന്‍ ടെന്‍ ഡോഷേറ്റിനെയും അഭിഷേക് നായരെയുമാണ് അസിസ്റ്റന്റ് പരിശീലകരാക്കിയത്. പരാസ് മാംബ്രെയില്‍ നിന്ന് ബൗളിങ് പരിശീലകന്റെ ഉത്തരവാദിത്തം മോര്‍ണി മോര്‍ക്കല്‍ ഏറ്റെടുത്തു.
പിന്നീട് ഇന്ത്യന്‍ ടീമിന്റെ ബാറ്റിങ് മോശമായതോടെ സിതാന്‍ഷു കൊട്ടക്കിനെ ബാറ്റിങ് കോച്ചായി ബിസിസിഐ നിയമിക്കുകയുണ്ടായി. ന്യൂസിലന്‍ഡിനെതിരെ സ്വന്തം നാട്ടില്‍ ഇന്ത്യ തോല്‍ക്കുകയും ബോര്‍ഡര്‍-ഗവാസ്‌കര്‍ ട്രോഫിയില്‍ ഓസ്‌ട്രേലിയയോട് തോല്‍ക്കുകയും ചെയ്തതോടെയാണിത്. എന്‍സിഎ, ഇന്ത്യ എ ടീം പരിശീലകനായി സേവമനുഷ്ടിക്കുകയായിരുന്നു സിതാന്‍ഷു കൊട്ടക്.
രോഹിത് ശര്‍മ, വിരാട് കോഹ്ലി, ജഡേജ എന്നിവരെ തരംതാഴ്ത്തിയേക്കും; ബിസിസിഐ സെന്‍ട്രല്‍ കോണ്‍ട്രാക്റ്റ് ഉടന്‍
ഐസിസി ചാമ്പ്യന്‍സ് ട്രോഫി 2025ല്‍ ഇന്ത്യ ജേതാക്കളായപ്പോള്‍ ഡോഷേറ്റ്, മോര്‍ക്കല്‍, ദിലീപ്, കൊട്ടക് എന്നിവരെല്ലാം പരിശീലക സംഘത്തിലുണ്ടായിരുന്നു. ഇവര്‍ക്കെല്ലാം പുറമേ മൂന്ന് ത്രോഡൗണ്‍ സ്‌പെഷ്യലിസ്റ്റുകള്‍, രണ്ട് മസാജ് തെറാപ്പിസ്റ്റുകള്‍, രണ്ട് ഫിസിയോതെറാപ്പിസ്റ്റ്, ഒരു ടീം ഡോക്ടര്‍, ഒരു സെക്യൂരിറ്റി ആന്‍ഡ് ഓപറേഷന്‍സ് മാനേജര്‍, ഒരു കമ്പ്യൂട്ടര്‍ അനലിസ്റ്റ്, ലോജിസ്റ്റിക്കല്‍, മീഡിയ മാനേജര്‍മാര്‍ എന്നിവരുണ്ട്. പലരും ഏകദേശം ഒരു പതിറ്റാണ്ടായി ടീമിന്റെ ഭാഗമാണ്. രാഘവേന്ദ്രയെപ്പോലെ ചിലര്‍ 2011 മുതല്‍ ടീമിനൊപ്പമുണ്ട്. ഇവരെ മാറ്റാന്‍ സാധ്യതയില്ല.
ബാറ്റിങ് കോച്ചായി കൊട്ടകും ബൗളിങ് കോച്ചായി മോര്‍ക്കലും ഉള്ളതിനാല്‍ അസിസ്റ്റന്റ് കോച്ചിന്റെയും ഫീല്‍ഡിങ് കോച്ചിന്റെയും ആവശ്യമില്ലെന്ന് ബോര്‍ഡ് കരുതുന്നു. ഇതാണ് അഭിഷേക് നായര്‍ക്കും ടി ദിലീപിനും തടസമായത്. ദ്രാവിഡിന്റെ സപ്പോര്‍ട്ട് സ്റ്റാഫില്‍ നിന്ന് നിലനിര്‍ത്തപ്പെട്ട ഏക വ്യക്തിയായ ദിലീപില്‍ നിന്ന് ഫീല്‍ഡിങ് പരിശീലകന്റെ ഉത്തരവാദിത്തം ഡോഷേറ്റ് ഏറ്റെടുത്തേക്കും.
അവസാനം കളിച്ച ഒമ്പത് ടെസ്റ്റ് മത്സരങ്ങളില്‍ ആറെണ്ണത്തിലും തോറ്റതിനാല്‍ ഇംഗ്ലണ്ട് പര്യടനത്തെ പ്രധാന്യത്തോടെയാണ് ബോര്‍ഡ് സമീപിക്കുന്നത്. ജൂണിലാണ് ഇംഗ്ലണ്ടിനെതിരായ അഞ്ച് മത്സരങ്ങളുള്ള ടെസ്റ്റ് പരമ്പര. മുഴുവന്‍ സപ്പോര്‍ട്ട് സ്റ്റാഫും സെലക്ടര്‍മാരും കളിക്കാരും വളരെ ഗൗരവമായി എടുക്കണമെന്ന് ബോര്‍ഡ് ആഗ്രഹിക്കുന്നു. വൈറ്റ്-ബോള്‍ ക്രിക്കറ്റില്‍ മികച്ച പ്രകടനം തുടരുന്ന ഇന്ത്യ ഒമ്പത് മാസത്തിനുള്ളില്‍ ആദ്യമായി രണ്ട് ഐസിസി കിരീടങ്ങള്‍ ചൂടിയിരുന്നു.
രചയിതാവിനെക്കുറിച്ച്നിഷാദ് അമീന്‍16 വര്‍ഷമായി മാധ്യമരംഗത്ത് പ്രവര്‍ത്തിക്കുന്നു. കാലിക്കറ്റ് സര്‍വകലാശാലയില്‍ നിന്ന് മാസ് കമ്മ്യൂണിക്കേഷനില്‍ ബിരുദവും കാലിക്കറ്റ് പ്രസ് ക്ലബ്ബില്‍ നിന്ന് ടെലിവിഷന്‍ ജേണലിസത്തില്‍ പിജി ഡിപ്ലോമയും ഇംഗ്ലീഷ് സാഹിത്യത്തില്‍ ബിരുദാനന്തര ബിരുദവും നേടി. ഏഴ് വര്‍ഷം സൗദി അറേബ്യയില്‍ മാധ്യമപ്രവര്‍ത്തകനായിരുന്നു. സൗദിയില്‍ ഇന്ത്യന്‍ മീഡിയ ഫോറത്തിന്റെ ജനറല്‍ സെക്രട്ടറിയായും പ്രവര്‍ത്തിച്ചിട്ടുണ്ട്. സുപ്രഭാതം, മലയാളം ന്യൂസ്, തേജസ് ദിനപത്രങ്ങളില്‍ സീനിയര്‍ സബ് എഡിറ്ററായും ഗള്‍ഫ് ന്യൂസ് എഡിറ്ററായും സീനിയര്‍ റിപോര്‍ട്ടറായും കേരളത്തിലെയും ഗള്‍ഫിലെയും വിവിധ ബ്യൂറോകളിലും എഡിറ്റോറിയല്‍ ഡെസ്‌കിലും ന്യൂഡല്‍ഹി, റിയാദ്, ജിദ്ദ, യുഎഇ എന്നിവിടങ്ങളിലും ജോലിചെയ്തു. ടൈംസ് ഓഫ് ഇന്ത്യയുടെ ഭാഗമായ സമയം മലയാളത്തില്‍ കണ്ടന്റ് പ്രൊഡ്യൂസറാണ്.… കൂടുതൽ വായിക്കുക