പെനാൽറ്റി ഷൂട്ടൗട്ടിൽ സ്പെയിൻ തരിപ്പണം; കണ്ണീരണിഞ്ഞ് ക്രിസ്റ്റ്യാനോ, യുവേഫ നേഷൻസ് ലീഗ് കിരീടം പോർച്ചുഗലിന്

ആവേശം ഒട്ടും കുറയാതിരുന്ന മത്സരത്തിൽ തുടക്കത്തിൽ സ്പെയിനിൻ്റെ കുതിപ്പാണ് കണ്ടത്. ഇരുപത്തിയൊന്നാം മിനിറ്റിൽ മാർട്ടിൻ സുബിമെൻഡി പോർച്ചുഗലിൻ്റെ വല കുലുക്കി. ഒരു ഗോളിൻ്റെ ആത്മവിശ്വാസത്തിൽ സ്പെയിൻ മൈതാനം നിറഞ്ഞെങ്കിലും ഈ ആത്മവിശ്വാസത്തിന് മിനിറ്റുകളുടെ ആയുസ്സ് മാത്രമാണുണ്ടായിരുന്നത്. ഇരുപത്തിയഞ്ചാം മിനിറ്റിൽ നുനോ മെൻഡിസ് ഗോൾ മടക്കി.

ഓരോ ഗോളുകളുടെ ആത്മവിശ്വാസത്തിൽ ഇരു ടീമുകളും കളം നിറഞ്ഞെങ്കിലും ആദ്യ പകുതി അവസാനിക്കാൻ മിനിറ്റുകൾ അവശേഷിക്കെ സ്പെയിൻ പോർച്ചുഗലിനെ വീണ്ടും ഞെട്ടിച്ചു. മൈക്കൽ ഒയാർ സബാൽ ആണ് സ്പെയിനിൻ്റെ രണ്ടാം ഗോൾ നേടിയത്. ഒരു ഗോളിൻ്റെ ലീഡിൽ സ്പെയിൻ മുന്നേറ്റത്തിൻ്റെ കെട്ടഴിച്ചെങ്കിലും ക്രിസ്റ്റ്യാനോ റോണാൾഡോയുടെ അറുപത്തിയൊന്നും മിനിറ്റിൽ പിറന്നതോടെ സ്പെയിൻ പതറി. 2-2 എന്ന സമനിലക്കുരുക്കഴിക്കാൻ സ്പെയിനും പോർച്ചുഗലും കട്ടയ്ക്ക് നിന്നതോടെ മത്സരം ആവേശത്തിലായി.

ഗോൾ എന്നുറപ്പിച്ച പല നിമിഷങ്ങളും ഫലം കാണാതെ വന്നതോടെ മത്സരം നീണ്ടു. നിശ്ചിത സമയവും എക്സ്ട്രാ ടൈമും കഴിഞ്ഞതോടെ മത്സരം പെനാൽറ്റി ഷൂട്ടൗട്ടിലേക്ക് എത്തി. 120 മിനിറ്റിന് ശേഷവും ആർക്കും ഗോൾ സ്വന്തമാക്കാനായില്ല. ആവേശത്തിൻ്റെ കൊടുമുടി കണ്ട പെനാൽറ്റി ഷൂട്ടൗട്ടിൽ പോർച്ചുഗലിനായി കിക്ക് എടുത്തവരെല്ലാം സ്പെയിനിൻ്റെ വല നിറച്ചപ്പോൾ സ്പെയിനിന് പിഴച്ചു. സ്പാനിഷ് താരം അൽവാരോ മൊറോട്ടയുടെ കിക്ക് പോർച്ചുഗൾ ഗോൾ കീപ്പർ തടഞ്ഞതാണ് സ്പെയിനിൻ്റെ സ്വപ്നങ്ങൾ തകർത്തെറിഞ്ഞത്.

ഗോൺസാലോ റാമോസ്, വിട്ടീഞ്ഞ, ബ്രൂണോ ഫെർണാണ്ടസ്, ന്യൂനൊ മെൻഡസ്, റൂബൻ ഡയസ് എന്നിവർ ലക്ഷ്യം കണ്ടു. സ്പെയിനായി മൈക്കൽ മെറീനോ, അലക്സ് ബയോന, ഇസ്കോ എന്നിവർ ലക്ഷ്യം കണ്ടെങ്കിലും പോർച്ചുഗലിൻ്റെ വിജയത്തിന് സാക്ഷിയാകാനായിരുന്നു അവരുടെ വിധി.