IPL 2025: 2025 സീസൺ ഇന്ത്യൻ പ്രീമിയർ ലീഗിലെ ആദ്യ രണ്ട് കളികളിലും പരാജയപ്പെട്ട രാജസ്ഥാൻ റോയൽസ്, അടുത്ത മത്സരത്തിൽ ടീമിൽ ചില നിർണായക മാറ്റങ്ങൾ വരുത്തണം. ചെന്നൈ സൂപ്പർ കിങ്സിനെയാണ് അടുത്ത കളിയിൽ അവർ നേരിടുക.
പേരുകേട്ട താരങ്ങളുടെ ഫ്ലോപ്പ് പ്രകടന‌ങ്ങളാണ് ആദ്യ കളികളിൽ രാജസ്ഥാൻ റോയൽസിന് തിരിച്ചടിയായത്. കൊട്ടിഘോഷിച്ചു കൊണ്ടു വന്ന ചില താരങ്ങളുടെ പ്രകടനം അതിദയനീയമായിരുന്നു. ഈ സാഹചര്യത്തിൽ അടുത്ത കളിയിൽ രാജസ്ഥാൻ റോയൽസ് ടീമിൽ ചില സുപ്രധാന മാറ്റങ്ങൾ അനിവാര്യമാണ്. വിജയവഴിയിലേക്ക് എത്താൻ ദയനീയ ഫോമിലുള്ള ചില കളിക്കാരെ റോയൽസ് അവരുടെ പ്ലേയിങ് ഇലവനിൽ നിന്ന് മാറ്റിയേ തീരൂ. അത്തരത്തിൽ രാജസ്ഥാൻ റോയൽസ് പ്ലേയിങ് ഇലവനിൽ നിന്ന് ഒഴിവാക്കേണ്ട രണ്ട് പ്രധാന കളിക്കാരെ നോക്കാം.
കഴിഞ്ഞ മെഗാ ലേലത്തിൽ രാജസ്ഥാൻ റോയൽസ് 4.2 കോടി രൂപക്ക് സ്വന്തമാക്കിയ നിതീഷ് റാണ സീസണിലെ ആദ്യ രണ്ട് മത്സരങ്ങളിലും വൻ ഫ്ലോപ്പായി. സൺ റൈസേഴ്സ് ഹൈദരാബാദിന് എതിരെ എട്ട് പന്തിൽ 11 റൺസ് നേടി പുറത്തായ അദ്ദേഹം, രണ്ടാമത്തെ കളിയിൽ കെകെആറിന് എതിരെ ഒൻപത് പന്തിൽ എട്ട് റൺസ് മാത്രമാണ് നേടിയത്. ഒട്ടും ഫോമിലല്ല എന്ന് തെളിയിക്കുന്നതാണ് ഈ കളികളിലെ നിതീഷിന്റെ ബാറ്റിങ്. നാലാം നമ്പരിൽ നിതീഷ് ഫ്ലോപ്പായത് രണ്ട് മത്സരങ്ങളിലും റോയൽസിന് തിരിച്ചടി നൽകി.
ഈ മാസം 30 ന് ചെന്നൈ സൂപ്പർ കിങ്സിന് എതിരെ നടക്കാനിരിക്കുന്ന മൂന്നാമത്തെ മത്സരത്തിൽ നിതീഷ് റാണയെ പ്ലേയിങ് ഇലവനിൽ നിന്ന് ഒഴിവാക്കി പകരം കുനാൽ സിങ് റാത്തോറിന് രാജസ്ഥാൻ ഒരു അവസരം നൽകണം. 2023 മുതൽ റോയൽസിന് ഒപ്പമുള്ള കുനാൽ സിങ് ഇടം കൈയ്യൻ ബാറ്ററും വിക്കറ്റ് കീപ്പറുമാണ്. മധ്യനിരയിൽ മികച്ച സ്ട്രൈക്ക് റേറ്റിൽ ബാറ്റ് വീശാൻ മികവുള്ള അദ്ദേഹം, സമീപകാലത്ത് അഭ്യന്തര ക്രിക്കറ്റിൽ മികച്ച ഫോമിലാണ് എന്നതും ശ്രദ്ധേയം.
ദയനീയ ഫോമിലൂടെ കടന്നുപോകുന്ന ഇംഗ്ലീഷ് പേസർ ജോഫ്ര ആർച്ചറെയും രാജസ്ഥാൻ റോയൽസ് അടുത്ത കളിയിൽ ടീമിൽ നിന്ന് ഒഴിവാക്കണം. ഇക്കഴിഞ്ഞ മെഗാ ലേലത്തിൽ നിന്ന് 12.5 കോടി രൂപക്ക് റോയൽസ് വാങ്ങിയ ആർച്ചർ 2025 സീസണിലെ ആദ്യ രണ്ട് കളികളിലും വൻ ഫ്ലോപ്പായിരുന്നു. ഹൈദരാബാദിന് എതിരെ നാല് ഓവറുകളിൽ 76 റൺസ് വിട്ടുകൊടുത്ത ആർച്ചർ, കെകെആറിന് എതിരെ 2.3 ഓവറുകളിൽ 33 റൺസാണ് വഴങ്ങിയത്. ഈ രണ്ട് കളികളിലും ഒരു വിക്കറ്റ് പോലും നേടാനും ആർച്ചർക്കായില്ല.
ഈ സീസണിൽ ആകെ എറിഞ്ഞ 6.3 ഓവറുകളിൽ 109 റൺസ് വഴങ്ങിക്കഴിഞ്ഞ ആർച്ചർ രാജസ്ഥാന്റെ ദുർബല ലിങ്കായി മാറിക്കഴിഞ്ഞു. നിലവിലെ ഫോം കണക്കിലെടുത്ത് അടുത്ത കളിയിൽ താരത്തെ പുറത്തിരുത്താൻ രാജസ്ഥാൻ തയ്യാറാകണം. ആർച്ചറിന് പകരം ദക്ഷിണാഫ്രിക്കൻ കൗമാര പേസർ ക്വെന മഫാക്കക്ക് ഒരു അവസരം നൽകി നോക്കാവുന്നതാണ്. 18 വയസ് മാത്രം പ്രായമുള്ള മഫാക്ക ഇടം കൈയ്യൻ പേസറാണ്.
സീസണിലെ ആദ്യ രണ്ട് കളികളിലും പരാജയപ്പെട്ട രാജസ്ഥാൻ റോയൽസ്, നിലവിൽ ഐപിഎൽ പോയിന്റ് പട്ടികയിൽ അവസാന സ്ഥാനത്താണ്. ഈ മാസം 30 ന് ചെന്നൈ സൂപ്പർ കിങ്സിന് എതിരെയാണ് അവരുടെ അടുത്ത മത്സരം.
രചയിതാവിനെക്കുറിച്ച്ഗോകുൽ എസ്ഗോകുൽ എസ്- സമയം മലയാളത്തിൽ ഡിജിറ്റൽ കണ്ടൻ്റ് പ്രൊഡ്യൂസർ. സ്പോർട്സ് ഇഷ്ട വിഷയം. ഇന്ത്യൻ സൂപ്പർ ലീഗ്, സന്തോഷ് ട്രോഫി അടക്കം വിവിധ ടൂർണമെന്റുകൾ റിപ്പോർട്ട് ചെയ്തിട്ടു‌ണ്ട്. 2017 മുതൽ മാധ്യമ പ്രവർത്തന രംഗത്ത് സജീവം. ഇടക്കാലത്ത് അധ്യാപകനായും ജോലി ചെയ്തു.… കൂടുതൽ വായിക്കുക