ചാമ്പ്യൻസ് ട്രോഫി ഫൈനലിന് ശേഷം വമ്പൻ വിവാദം, വലിയ നിരാശ നൽകുന്ന കാര്യമെന്ന് തുറന്നടിച്ച് ഷോയിബ് അക്തർ

സാധാരണ ഐസിസി ഒഫീഷ്യലുകളും, ഫൈനലിൽ കളിക്കുന്ന ടീമുകളുടെ ബോർഡ് പ്രതിനിധികളും ഒപ്പം ആതിഥേയ ക്രിക്കറ്റ് ബോർഡിന്റെ ഒഫീഷ്യലുകളുമാണ് സമ്മാനദാന ചടങ്ങിൽ പങ്കെടുക്കുന്നത്. 29 വർഷത്തെ ഇടവേളക്ക് ശേഷം ആതിഥേയത്വം വഹിച്ച ആദ്യ ഐസിസി ടൂർണമെന്റിന്റെ സമ്മാനദാന ചടങ്ങിൽ പാകിസ്താൻ ക്രിക്കറ്റ് ബോർഡിൽ നിന്നുള്ള ഒരു ഒഫീഷ്യൽ പോലും പങ്കെടുത്തില്ല. ഇതാണ് വൻ വിവാദമായിരിക്കുന്നത്. മുൻ പാകിസ്താൻ താരം ഷോയിബ് അക്തറും ഇക്കാര്യത്തിൽ നിരാശ പ്രകടിപ്പിച്ച് രംഗത്തെത്തി.

Also Read: ഇന്ത്യയുടെ ആ അവസാന മിനിറ്റ് തീരുമാനം ചാമ്പ്യൻസ് ട്രോഫി വിജയത്തിൽ പ്രധാന വഴിത്തിരിവായി; നടന്നത് ഇങ്ങനെ

“ഇന്ത്യ ഐസിസി ചാമ്പ്യൻസ് ട്രോഫി ജയിച്ചു. എന്നാൽ ഞാനൊരു വിചിത്രമായ കാര്യം കണ്ടു. പാകിസ്താൻ ക്രിക്കറ്റ് ബോർഡിൽ നിന്നുള്ള ഒരു പ്രതിനിധി ഇവിടെ ഉണ്ടായിരുന്നില്ല. പാകിസ്താനാണ് ചാമ്പ്യൻസ് ട്രോഫിക്ക് ആതിഥേയത്വം വഹിച്ചത്. ഇവിടെ പാകിസ്താന്റെ പ്രാതിനിധ്യം ഉണ്ടായിരുന്നില്ല. ഇത് എനിക്ക് മനസിലാക്കാവുന്നതിന് അപ്പുറമാണ്”.

Also Read: ചാമ്പ്യൻസ് ട്രോഫി ഫൈനലിന് ശേഷം ആ വമ്പൻ കാര്യം വെളിപ്പെടുത്തി രോഹിത് ശർമ; ആരാധകർ കാത്തിരുന്ന വാർത്ത

“എന്തുകൊണ്ടാണ് ആരും ട്രോഫിയെ പ്രതിനിധീകരിക്കാൻ വരാതിരുന്നത്. കിരീടം നൽകാൻ ആരും ഇവിടെ വരാതിരുന്നത് എന്തുകൊണ്ടാണ്? ഇതിനെക്കുറിച്ച് ചിന്തിക്കുക. ഇതൊരു ലോക വേദിയാണ്. നിങ്ങൾ ഇവിടെ ഉണ്ടാകേണ്ടതായിരുന്നു. പക്ഷേ നിരാശാജനകമെന്ന് പറയട്ടെ, എനിക്ക് അവിടെ പാകിസ്താൻ ക്രിക്കറ്റ് ബോർഡിന്റെ ഒരംഗത്തെയും കാണാൻ സാധിച്ചില്ല. ഇത് ഞങ്ങൾ ആതിഥേയത്വം വഹിച്ച ടൂർണമെന്റാണ്, എന്നിട്ടും ഇവിടെ ആരും ഇല്ല. ഇത് കാണുമ്പോൾ എനിക്ക് വളരെയധികം സങ്കടമുണ്ട്.” ഷോയിബ് അക്തർ പറഞ്ഞു.