ഇൻട്രാ സ്ക്വാഡ് മത്സരത്തിൽ ഇഷാൻ കിഷന്റെ വെടിക്കെട്ട് ബാറ്റിങ്, 16 പന്തിൽ ഫിഫ്റ്റി; അഭിഷേക് ശർമയും തിളങ്ങി

ഐപിഎൽ മുന്നൊരുക്കത്തിന്റെ ഭാഗമായി കഴിഞ്ഞ ദിവസം സൺ റൈസേഴ്സ് ഹൈദരാബാദ് ഒരു ഇൻട്രാ സ്ക്വാഡ് പരിശീലന മത്സരം സംഘടിപ്പിച്ചിരുന്നു. ഇത്തവണത്തെ മെഗാ ലേലത്തിൽ വൻ തുകക്ക് സ്വന്തമാക്കിയ ഇന്ത്യൻ യുവ വിക്കറ്റ് കീപ്പർ ബാറ്റർ ഇഷാൻ കിഷൻ ഈ മത്സരത്തിൽ ബാറ്റിങ് വെടിക്കെട്ട് നടത്തി എന്നതാണ് ശ്രദ്ധേയം. എസ്‌ ആർ എച്ച് എ ടീമും എസ്‌ ആർ എച്ച് ബി‌ ടീമും തമ്മിലായിരുന്നു ഈ മത്സരം.

എസ്‌ ആർ എച്ച് എ ടീമിന് വേണ്ടി ഇഷാൻ കിഷനും അഭിഷേക് ശർമയും ചേർന്നാണ് ബാറ്റിങ് ഓപ്പൺ ചെയ്തത്. കാമിന്ദു മെൻഡിസ് എറിഞ്ഞ ആദ്യ ഓവറിൽ ഇരുവരും ചേർന്ന് 21 റൺസാണ് അടിച്ചത്. മിന്നും ഫോമിലായിരുന്ന അഭിഷേക് ശർമ വെറും ഒൻപത് പന്തുകളിൽ 28 റൺസെടുത്ത് പുറത്തായി. ഇതിന് ശേഷവും വെടിക്കെട്ട് തുടർന്ന ഇഷാൻ കിഷൻ വെറും 16 പന്തുകളിലാണ് അർധസെഞ്ചുറിയിൽ എത്തിയത്. പിന്നാലെ 23 പന്തിൽ‌ 64 റൺസെടുത്ത് താരം പുറത്തായി. പവർപ്ലേ അവസാനിക്കുമ്പോൾ 106/2 എന്ന നിലയിലായിരുന്നു എ ടീം.

Also Read: സഞ്ജുവിന്റെ കാര്യത്തിൽ പ്ലാൻ ‘ബി’ യുമായി രാജസ്ഥാൻ റോയൽസ്, കോളടിക്കുക മറ്റൊരു ഇന്ത്യൻ താരത്തിന്; സൂചനകൾ ഇങ്ങനെ

പരിശീലന മത്സരമായത് കൊണ്ടു തന്നെ രണ്ട് തവണ ബാറ്റ് ചെയ്യാൻ താരങ്ങൾക്ക് അവസരം ലഭിച്ചു‌. എസ്‌ ആർ എച്ച് ബി‌ ടീമിന് വേണ്ടിയും ബാറ്റിങ്ങിന് ഇറങ്ങിയ ഇഷാൻ കിഷൻ രണ്ടാം തവണ 21 പന്തിലാണ് അർധസെഞ്ചുറി നേടിയത്. 30 പന്തിൽ 73 റൺസെടുത്ത് മിന്നും ഫോമിൽ ബാറ്റ് ചെയ്യവെ അദ്ദേഹം കളി മതിയാക്കി പവലിയനിലേക്ക് തിരിച്ചുപോയി. ഇക്കഴിഞ്ഞ ഐപിഎൽ മെഗാ ലേലത്തിൽ 30 ലക്ഷം രൂപക്ക് ഹൈദരാബാദ് സ്വന്തമാക്കിയ അനികേത് വർമയും പരിശീലന മത്സരത്തിൽ വെടിക്കെട്ട് ബാറ്റിങ് കാഴ്ച വെച്ചു. ഒരു തവണ 17 പന്തിൽ 46 റൺസ് നേടിയ താരം മറ്റൊരു പ്രാവശ്യം 15 പന്തിൽ 28 റൺസ് നേടി.

Also Read: പരിശീലനത്തിൽ വെടിക്കെട്ട് നടത്തി സഞ്ജുവിന്റെ പുതിയ വജ്രായുധം; രാജസ്ഥാൻ റോയൽസിന്റെ പുതിയ താരം ഇക്കുറി ഞെട്ടിച്ചേക്കും

2025 സീസൺ ഐപിഎല്ലിനുള്ള സൺ റൈസേഴ്സ് ഹൈദരാബാദ് സ്ക്വാഡ്: ഇഷാൻ കിഷൻ, ഹർഷൽ പട്ടേൽ, രാഹുൽ ചഹർ, മുഹമ്മദ് ഷമി, ആദം സാമ്പ, അഥർവ ടൈഡെ, അഭിനവ് മനോഹർ, സിമർജിത് ജിത്, സീഷാൻ അൻവാരി, ജയ്ദേവ് ഉനദ്കട്ട്, വിയാൻ മൾഡര് കാമിന്ദു മെൻഡിസ്, സച്ചിൻ ബേബി, അനികേത് വർമ, ഈഷാൻ മലിംഗ, ഹെൻറിച്ച് ക്ലാസൻ, പാറ്റ് കമ്മിൻസ്, അഭിഷേക് ശർമ, ട്രാവിസ് ഹെഡ്, നിതീഷ് കുമാർ റെഡ്ഡി.