രാജസ്ഥാൻ റോയൽസിൽ സഞ്ജുവിന്റെ സർപ്രൈസ് ട്രമ്പ് കാർഡാകാൻ ഈ മൂന്ന് താരങ്ങൾ; ഇവർ മിന്നിയാൽ ടീം ഇത്തവണ വേറെലെവലാകും

ഇത്തവണ ഐപിഎല്ലിലെ തന്നെ ഏറ്റവും വലിയ ചർച്ചാ വിഷയങ്ങളിൽ ഒരാളാണ് രാജസ്ഥാൻ റോയൽസ് താരം വൈഭവ് സൂര്യവംശി. 13 വയസ് മാത്രം പ്രായമുള്ള ഈ ഇടം കൈയ്യൻ ബാറ്ററെ മെഗാ ലേലത്തിൽ നിന്ന് 1.1 കോടി രൂപക്കായിരുന്നു രാജസ്ഥാൻ സ്വന്തമാക്കിയത്. പ്രായം 13 വയസ് മാത്രമാണെങ്കിലും വെടിക്കെട്ട് ബാറ്റിങ്ങിന്റെ ആശാനാണ് വൈഭവ് സൂര്യവംശി. ഇക്കഴിഞ്ഞ അണ്ടർ 19 ഏഷ്യാ കപ്പിൽ അദ്ദേഹം അത് തെളിയിച്ചതാണ്. രാജസ്ഥാൻ റോയൽസിന്റെ പരിശീലന ക്യാമ്പിൽ സൂര്യവംശി മികച്ച ഫോമിലാണെന്നാണ് പുറത്തുവരുന്ന റിപ്പോർട്ടുകൾ. അതുകൊണ്ടു തന്നെ താരം വരും സീസണിൽ റോയൽസിന്റെ ട്രമ്പ് കാർഡുകളിൽ ഒരാളായാൽ അത്ഭുതപ്പെടാനില്ല.

Also Read: ഐപിഎല്ലിന് തൊട്ടുമുൻപ് രാജസ്ഥാൻ റോയൽസിന് ഹാപ്പി ന്യൂസ്; ടീമിന്റെ ആ രണ്ട് സൂപ്പർ താരങ്ങളും ആദ്യ മത്സരം കളിക്കും

2024 ലെ അണ്ടർ 19 ലോകകപ്പിൽ ഉജ്ജ്വല പ്രകടനം കാഴ്ച വെച്ച് ക്രിക്കറ്റ് ലോകത്തെ അമ്പരപ്പിച്ച താരമാണ് ദക്ഷിണാഫ്രിക്ക‌ൻ പേസറായ ക്വെന മഫാക്ക. ടൂർണമെന്റിലെ ഉയർന്ന വിക്കറ്റ് വേട്ടക്കാരനുമായിരുന്നു അദ്ദേഹം. ഇത്തവണത്തെ ഐപിഎൽ മെഗാ ലേലത്തിൽ നിന്നാണ് രാജസ്ഥാൻ റോയൽസ് ഈ ഇടം കൈയ്യൻ പേസറെ സ്വന്തമാക്കിയത്. അതിവേഗ പേസറായ താരത്തിന്റെ കൈവശം മികച്ച വേരിയേഷനുണ്ട്. ഇന്ത്യൻ പ്രീമിയർ ലീഗിന്റെ 2025 സീസണിൽ റോയൽസിന്റെ രഹസ്യ ആയുധങ്ങളിൽ ഒന്നാകും മഫാക്ക.

2025 സീസൺ ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിന്റെ സർപ്രൈസ് പാക്കേജാകാൻ സാധ്യതയുള്ള മറ്റൊരു താരമാണ് ശുഭം ദൂബെ‌. അഭ്യന്തര ക്രിക്കറ്റിൽ വിദർഭക്ക് വേണ്ടി കളിക്കുന്ന ദൂബെ വെടിക്കെട്ട് ബാറ്റിങ്ങിന് പേരുകേട്ട താരമാണ്. കഴിഞ്ഞ സീസണിലും രാജസ്ഥാൻ റോയൽസിന്റെ താരമായിരുന്ന ദൂബെയെ ഇക്കുറി മെഗാ ലേലത്തിൽ നിന്ന് അവർ ടീമിലേക്ക് തിരിച്ചെത്തിക്കുകയായിരുന്നു‌.

Also Read: ഇൻട്രാ സ്ക്വാഡ് മത്സരത്തിൽ ഇഷാൻ കിഷന്റെ വെടിക്കെട്ട് ബാറ്റിങ്, 16 പന്തിൽ ഫിഫ്റ്റി; അഭിഷേക് ശർമയും തിളങ്ങി

2025 സീസൺ ഐപിഎല്ലിൽ രാജസ്താൻ റോയൽസ് ഫിനിഷറായി ദൂബെയെ ഉപയോഗപ്പെടുത്താനാണ് സാധ്യത. ടീമിന്റെ ഇമ്പാക്ട് പ്ലേയറായും അദ്ദേഹത്തെ അവർ പരിഗണിച്ചേക്കും. ടി20 യിൽ 30 മത്സരങ്ങളിൽ നിന്ന് 38.35 ബാറ്റിങ് ശരാശരിയിൽ 652 റൺസാണ് ഈ ഇടം കൈയ്യൻ ബാറ്ററുടെ സമ്പാദ്യം. 152.69 ആണ് ഈ കളികളിൽ താരത്തിന്റെ സ്ട്രൈക്ക് റേറ്റ്. വരും സീസൺ ഐപിഎൽ ദുബെയുടെ കരിയർ മാറ്റിമറിച്ചാലും അത്ഭുതപ്പെടേണ്ട.

അതേ സമയം ഐപിഎല്ലിലെ തങ്ങളുടെ രണ്ടാം കിരീടമാണ് ഇത്തവണ രാജസ്ഥാൻ റോയൽസ് ലക്ഷ്യം വെക്കുന്നത്‌. ഈ മാസം 23 നാണ് സീസണിൽ അവരുടെ ആദ്യ മത്സരം. കഴിഞ്ഞ സീസണിലെ റണ്ണറപ്പുകളായ സൺ റൈസേഴ്സ് ഹൈദരാബാദാണ് എതിരാളികൾ.