വെടിക്കെട്ട് സെഞ്ചുറി നേടി റിയാൻ പരാഗ്, ഞെട്ടിച്ച് ജൂറലും ജയ്സ്വാളും; സഞ്ജുവും ടീമും ഇക്കുറി ഡബിൾ സ്ട്രോങ്ങ്

ടീമിന്റെ പ്രധാന താരങ്ങളായ റിയാൻ പരാഗും, യശസ്വി ജയ്സ്വാളും, ധ്രുവ് ജൂറലും ഫോമിലായതാണ് ടീമിനെ ആവേശം കൊള്ളിക്കുന്നത്. ആദ്യ കളിക്ക് മുൻപുള്ള ഇൻട്രാ സ്ക്വാഡ് പരിശീലന മത്സരത്തിലാണ് ഈ താരങ്ങൾ വെടിക്കെട്ടുമായി മിന്നിച്ചത്.

റിയാൻ പരാഗാണ് പരിശീലന മത്സരത്തിൽ ഏറ്റവും മികച്ച പ്രകടനം കാഴ്ച വെച്ച രാജസ്ഥാൻ റോയൽസ് താരം. ടീമിന്റെ ഇൻട്രാ സ്ക്വാഡ് പരിശീലന മത്സരത്തിൽ വെടിക്കെട്ട് സെഞ്ചുറിയാണ് ഈ യുവ താരം നേടിയത്. 64 പന്തുകളിൽ നിന്ന് 144 റൺസെടുത്ത് പരാഗ് ഈ കളിയിൽ പുറത്താകാതെ നിന്നു. 16 ഫോറുകളും 10 സിക്സറുകളും താരത്തിന്റെ ബാറ്റിൽ നിന്ന് പിറന്നു. രാജസ്ഥാൻ റോയൽസ് ഫ്രാഞ്ചൈസി തന്നെയാണ് പരാഗിന്റെ ഈ ഇ‌ന്നിങ്സിനെക്കുറിച്ചുള്ള വിവരങ്ങൾ പുറത്ത് വിട്ടത്.

Also Read: ആദ്യ കളിക്ക് മുൻപ് രാജസ്ഥാൻ റോയൽസിന് ഹാപ്പി ന്യൂസ്, ക്യാപ്റ്റൻ സഞ്ജു സാംസൺ അവസാനം ടീമിനൊപ്പം ചേർന്നു

സീസണിലെ ആദ്യ കളിക്ക് മുമ്പ് റോയൽസിന് വലിയ ആത്മവിശ്വാസം നൽകുന്നുണ്ട് പരാഗിന്റെ ഫോം. നേരത്തെ 2024 സീസണിൽ രാജസ്ഥാൻ റോയൽസിന്റെ ഉയർന്ന റൺ വേട്ടക്കാരനായിരുന്നു പരാഗ്. 52.09 ബാറ്റിങ് ശരാശരിയിൽ 573 റൺസായിരുന്നു പരാഗ് സ്കോർ ചെയ്തത്. നാലാം നമ്പരിലേക്ക് പ്രൊമോഷൻ ലഭിച്ചതോടെയായിരുന്നു താരത്തിന്റെ തലവര മാറിയത്. 2025 സീസണിലും റോയൽസിന്റെ ബാറ്റിങ് നിരയിലെ നാലാമനാകും പരാഗ്.

രാജസ്ഥാൻ റോയൽസ് വിക്കറ്റ് കീപ്പർ ധ്രുവ് ജൂറൽ, യശസ്വി ജയ്സ്വാൾ എന്നിവരും ഇൻട്രാ സ്ക്വാഡ് പരിശീലന മത്സരത്തിൽ മികച്ച ഫോമിൽ ബാറ്റ് വീശി. ധ്രുവ് ജൂറൽ 44 പന്തിൽ 104 റൺസും ജയ്സ്വാൾ 34 പന്തിൽ 83 റൺസുമാണ് നേടിയത്. ഇവർക്ക് പുറമെ ക്യാപ്റ്റൻ സഞ്ജു സാംസണും തിളങ്ങിയെന്നാണ് വിവരം.‌ മികച്ച സിക്സറുകളും ഓഫ് ഡ്രൈവ്, സ്ക്വയർ കട്ട് ഷോട്ടുകളുമായാണ് സഞ്ജു കളം നിറഞ്ഞത്.

Also Read: ഈ സീസണിൽ രാജസ്ഥാൻ റോയൽസിന്റെ ഇമ്പാക്ട് താരം ഈ മൂന്ന് പേരിൽ ഒരാൾ? സഞ്ജുവും ടീമും രണ്ടും കൽപ്പിച്ച്

അതേ സമയം കഴിഞ്ഞ സീസണിൽ കളിച്ച ടീമിൽ നിന്ന് വമ്പൻ മാറ്റങ്ങളോടെയാണ് രാജസ്ഥാ‌‌ൻ ഇത്തവണ ഇറങ്ങുന്നത്. മുൻ സീസണുകളിൽ ടീമിന്റെ പ്രധാന കരുത്തായിരുന്ന ജോസ് ബട്ലർ, ട്രെന്റ് ബോൾട്ട്, യുസ്വേന്ദ്ര ചഹൽ, ആർ അശ്വിൻ, ആവേശ് ഖാൻ എന്നിവർ ഇത്തവണ ടീമിന് ഒപ്പമില്ല. അതേ സമയം ജോഫ്ര ആർച്ചർ, വനിന്ദു ഹസരംഗ, മഹീഷ് തീക്ഷണ, നിതീഷ് റാണ എന്നിവരെ രാജസ്ഥാൻ ഇത്തവണ പുതുതായി ടീമിലെത്തിച്ചു. മെഗാ ലേലത്തിന് മുൻപ് ആറ് കളിക്കാരെയായിരുന്നു റോയൽസ് നിലനിർത്തിയത്. സഞ്ജു, ജയ്സ്വാൾ, പരാഗ്, ജൂറൽ, ഹെറ്റ്മെയർ, സന്ദീപ് ശർമ എന്നിവരാണിത്.