മരുന്നുകളെ മാത്രം ആശ്രയിക്കാതെ രക്തത്തിലെ പഞ്ചസാരയുടെ അളവ് നിയന്ത്രിക്കാൻ ഫലപ്രദമായ മാർഗ്ഗങ്ങൾ തേടുന്ന നിരവധി പേരുണ്ട്. പ്രമേഹ നിയന്ത്രണത്തെ സഹായിക്കുന്നതിനുള്ള കഴിവ് ഉൾപ്പെടെ നിരവധി ആരോഗ്യ ഗുണങ്ങൾക്കായി ആയുർവേദത്തിൽ വളരെക്കാലമായി ഉപയോഗിച്ചു വരുന്നതാണ് മഞ്ഞൾ. വെറും വയറ്റിൽ മഞ്ഞൾ വെള്ളം കുടിക്കുന്നത് ഉയർന്ന രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിനുള്ള സ്വാഭാവികവും ലളിതവുമായ മാർഗമാണ്. പ്രമേഹത്തെ ഫലപ്രദമായി കൈകാര്യം ചെയ്യാൻ മഞ്ഞൾ വെള്ളം സഹായിക്കുന്നത് എങ്ങനെയെന്ന് അറിയാം.
രക്തത്തിലെ പഞ്ചസാരയുടെ അളവ് നിയന്ത്രിക്കുന്നു
മഞ്ഞളിൽ കുർക്കുമിൻ അടങ്ങിയിട്ടുണ്ട്. ഇത് രക്തത്തിലെ ഗ്ലൂക്കോസിന്റെ അളവ് നിയന്ത്രിക്കാൻ സഹായിക്കുന്ന ശക്തമായ ആന്റിഓക്‌സിഡന്റും ആന്റി-ഇൻഫ്ലമേറ്ററി സംയുക്തവുമാണ്. കുർക്കുമിൻ ഇൻസുലിൻ സെൻസിറ്റിവിറ്റി വർധിപ്പിക്കുകയും ഗ്ലൂക്കോസ് കൂടുതൽ കാര്യക്ഷമമായി ഉപയോഗിക്കാൻ ശരീരത്തെ പ്രാപ്തരാക്കുകയും ചെയ്യുന്നുവെന്ന് പഠനങ്ങൾ സൂചിപ്പിക്കുന്നു.
രാവിലെ വെറും വയറ്റിൽ മഞ്ഞൾ വെള്ളം കുടിക്കുന്നത് രക്തത്തിലെ പഞ്ചസാരയുടെ അളവ് സ്ഥിരപ്പെടുത്തുകയും ദിവസം മുഴുവൻ അളവിലെ ഏറ്റക്കുറച്ചിലുകൾ തടയുകയും ചെയ്യും. പതിവായി മഞ്ഞൾ വെള്ളം കുടിക്കുന്നത് ടൈപ്പ് 2 പ്രമേഹത്തിനുള്ള സാധ്യത കുറച്ചേക്കാം.
പ്രമേഹ സങ്കീർണതകൾക്കുള്ള സാധ്യത കുറയ്ക്കുന്നു
പ്രമേഹം പലപ്പോഴും നാഡീ തകരാറുകൾ, വൃക്കരോഗങ്ങൾ, ഹൃദയസംബന്ധമായ പ്രശ്നങ്ങൾ തുടങ്ങിയ സങ്കീർണതകളിലേക്ക് നയിക്കുന്നു. ആന്റിഓക്‌സിഡന്റ് സമ്പുഷ്ടമായതിനാൽ മഞ്ഞൾ വെള്ളം, ഈ സങ്കീർണതകൾക്ക് പ്രധാന കാരണമായ ഓക്സിഡേറ്റീവ് സമ്മർദ്ദത്തെ ചെറുക്കുന്നു. പതിവായി കുടിക്കുന്നത് രക്തക്കുഴലുകളെ സംരക്ഷിക്കാനും പ്രമേഹ ന്യൂറോപ്പതിയുടെ അപകടസാധ്യത കുറയ്ക്കാനും മൊത്തത്തിലുള്ള ഹൃദയാരോഗ്യത്തെ സഹായിക്കാനും സാധിക്കും.
ഇൻസുലിൻ സെൻസിറ്റിവിറ്റി മെച്ചപ്പെടുത്തുന്നു
മഞ്ഞൾ വെള്ളം ഇൻസുലിൻ സെൻസിറ്റിവിറ്റി മെച്ചപ്പെടുത്തും. രക്തത്തിലെ പഞ്ചസാരയുടെ അളവ് കുറയ്ക്കുന്നതിന് ശരീരം ഇൻസുലിൻ എത്രത്തോളം കാര്യക്ഷമമായി ഉപയോഗിക്കുന്നുവെന്നതിനെ ഇൻസുലിൻ സെൻസിറ്റിവിറ്റി സൂചിപ്പിക്കുന്നു. ഇൻസുലിൻ ഉൽപ്പാദിപ്പിക്കുന്ന പാൻക്രിയാറ്റിക് കോശങ്ങളുടെ പ്രവർത്തനം വർധിപ്പിക്കാൻ മഞ്ഞളിൽ അടങ്ങിയിരിക്കുന്ന കുർക്കുമിന് കഴിയുമെന്ന് ഗവേഷണങ്ങൾ സൂചിപ്പിക്കുന്നു.
ആന്റിഓക്‌സിഡന്റ് ഗുണങ്ങളാൽ സമ്പന്നമാണ്
മഞ്ഞൾ വെള്ളത്തിന്റെ മറ്റൊരു പ്രധാന സവിശേഷത ആന്റിഓക്‌സിഡന്റ് ഗുണങ്ങളാണ്. മഞ്ഞൾ വെള്ളം കുടിക്കുന്നതിലൂടെ ഓക്സിഡേറ്റീവ് സമ്മർദ്ദം ലഘൂകരിക്കാനും ഫ്രീ റാഡിക്കലുകളുടെ ദോഷകരമായ ഫലങ്ങളിൽ നിന്ന് ശരീരത്തെ സംരക്ഷിക്കാനും കഴിയും.
ദഹനാരോഗ്യത്തിന് ഗുണം ചെയ്യുന്നു
മഞ്ഞൾ വെള്ളം ദഹനാരോഗ്യത്തെ പ്രോത്സാഹിപ്പിക്കുന്നു. രക്തത്തിലെ പഞ്ചസാരയുടെ അളവ് സ്ഥിരമായി നിലനിർത്തുന്നതിന് ആരോഗ്യകരമായ ദഹനവ്യവസ്ഥ അത്യന്താപേക്ഷിതമാണ്. പിത്തരസം ഉൽപ്പാദനം വർധിപ്പിച്ച് കുടലിന്റെ ആരോഗ്യം വർധിപ്പിക്കുന്നതിലൂടെ മഞ്ഞൾ ആരോഗ്യകരമായ ദഹനത്തെ പ്രോത്സാഹിപ്പിക്കുന്നു.
ദഹനവ്യവസ്ഥ നല്ല രീതിയിൽ പ്രവർത്തിക്കുമ്പോൾ, നിങ്ങളുടെ ശരീരത്തിന് പോഷകങ്ങൾ നന്നായി ആഗിരണം ചെയ്യാനും രക്തത്തിലെ പഞ്ചസാരയുടെ അളവ് കൂടുതൽ ഫലപ്രദമായി നിയന്ത്രിക്കാനും കഴിയും.
മഞ്ഞൾ വെള്ളം തയ്യാറാക്കുന്ന വിധം
ഒരു ഗ്ലാസ് വെള്ളം ചൂടാക്കുക. ഇതിലേക്ക് ഒരു ടീസ്പൂൺ മഞ്ഞൾ പൊടി ചേർക്കുക. 5-7 മിനിറ്റ് തിളപ്പിക്കുക. ചൂടാറിയതിനുശേഷം അരിച്ചെടുത്ത് കുടിക്കുക. ഇതിലേക്ക് വേണമെങ്കിൽ കുറച്ച് കുരുമുളക് ചേർക്കാവുന്നതാണ്. പരമാവധി ആരോഗ്യ നേട്ടങ്ങൾക്കായി വെറും വയറ്റിൽ കുടിക്കുക.
മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.