IPL 2025: 2025 സീസൺ ഐപിഎല്ലിൽ ദയനീയ ഫോം തുടർന്ന് ലക്നൗ സൂപ്പർ ജയന്റ്സ് നായകൻ ഋഷഭ് പന്ത്. പന്തിന്റെ മോശം പ്രകടനങ്ങൾ ഗുണകരമാവുക സഞ്ജു സാംസണ്. കാരണം ഇങ്ങനെ.
ത‌ന്റെ മുൻ ടീം കൂടിയായ ഡെൽഹി ക്യാപിറ്റൽസിന് എതിരെയായിരുന്നു സീസണിൽ പന്തിന്റെ ലക്നൗ ആദ്യം കളിച്ചത്. അക്കൗണ്ട് തുറക്കാതെയാണ് ഈ മത്സരത്തിൽ അദ്ദേഹം പുറത്തായത്. സൺ റൈസേഴ്സ് ഹൈദരാബാദിന് എതിരെയായിരുന്നു സീസണിൽ ലക്നൗവിന്റെ രണ്ടാം മത്സരം. ഈ കളിയിൽ വെറും 15 റൺസ് മാത്രമെടുത്ത് അദ്ദേഹം പുറത്താവുകയായിരുന്നു.
ഐപിഎല്ലിൽ വമ്പൻ ഫ്ലോപ് ഷോ തുടർന്ന് ഋഷഭ് പന്ത്, കോളടിക്കുക സഞ്ജു സാംസണ്; പിന്നിൽ ഈ കാരണം
പഞ്ചാബ് കിങ്സിന് എതിരെ നടന്ന മൂന്നാം മത്സരത്തിലാകട്ടെ അഞ്ച് പന്തിൽ രണ്ട് റൺസ് നേടിയാണ് പന്ത് പവലിയനിൽ തിരിച്ചെത്തിയത്. 2025 സീസൺ ഐപിഎല്ലിൽ കളിച്ച മൂന്ന് മത്സരങ്ങളിൽ നിന്ന് പന്തിന്റെ സമ്പാദ്യം 17 റൺസ് മാത്രം. ആദ്യ രണ്ട് കളികൾക്ക് ശേഷം പന്തിന്റെ ഫോമൗട്ട് കാര്യമായ ചർച്ചയാകാതെ പോയെങ്കിലും മൂന്നാം കളിയിലും അദ്ദേഹം ഫ്ലോപ്പായതോടെ ആരാധകർ വിമർശനങ്ങളുമായി രംഗത്തെത്തി.
അതേ സമയം ഋഷഭ് പന്തിന്റെ ഫോമൗട്ട് രാജസ്ഥാൻ റോയൽസ് നായകൻ സഞ്ജു സാംസണ് ഗുണകരമാണ് എന്നതാണ് വാസ്തവം. നിലവിൽ ഇന്ത്യയുടെ ടി20 ടീമിന്റെ പ്രധാന വിക്കറ്റ് കീപ്പർ സഞ്ജുവാണ്. കഴിഞ്ഞ വർഷം ബംഗ്ലാദേശിന് എതിരെ നടന്ന പരമ്പര മുതലാണ് സഞ്ജു ടി20 ടീമിലെ പ്രധാനിയായത്. ഇതിന് ശേഷം ഋഷഭ് പന്തിനെ ഇന്ത്യ ടി20 ടീമിലേക്ക് പരിഗണിച്ചിട്ടേയില്ല.
2025 സീസൺ ഐപിഎല്ലിൽ മികച്ച പ്രകടനം കാഴ്ച വെച്ച് ഇന്ത്യയുടെ ടി20 സെറ്റപ്പിലേക്ക് മടങ്ങിയെത്താമെന്ന പ്രതീക്ഷയിലാണ് പന്ത്. അതിനിടെയാണ് സീസണിൽ താരം തുടർ പരാജയങ്ങളാൽ വലയുന്നത്. പന്ത് ഇപ്പോളത്തെ ഫോമിൽ നിന്ന് തിരിച്ചുവന്നില്ലെങ്കിൽ ഇന്ത്യയുടെ ടി20 ടീമിലേക്കുള്ള തിരിച്ചുവരവും അദ്ദേഹത്തിന് മറക്കാം.
മറുവശത്ത് ഇക്കുറി ഐപിഎല്ലിൽ ശരാശരി പ്രകടനം കാഴ്ചവെച്ചാൽ രാജസ്ഥാൻ റോയൽസ് നായകൻ സഞ്ജു സാംസണ് ഇന്ത്യൻ ടി20 ടീമിന്റെ വിക്കറ്റ് കീപ്പർ സ്ഥാനത്ത് തുടരാം. ഐപിഎല്ലിൽ ഇക്കുറി കളിച്ച മൂന്ന് മത്സരങ്ങളിൽ നിന്ന് 99 റൺസാണ് സഞ്ജുവിന്റെ സമ്പാദ്യം. ആദ്യ കളിയിൽ സൺ റൈസേഴ്സ് ഹൈദരാബാദിന് എതിരെ 66 റൺസ് നേടിയ സഞ്ജു, കൊൽക്കത്ത നൈറ്റ് റൈഡേഴ്സിന് എതിരെ 13 റൺസും, ചെന്നൈ സൂപ്പർ കിങ്സിന് എതിരെ 20 റൺസുമാണ് നേടിയത്.
Also Read: രാജസ്ഥാൻ റോയൽസിന്റെ ആ സർപ്രൈസ് നീക്കം വൻ വിജയം; സഞ്ജുവിന്റെ ടീമിന്റെ ബാറ്റിങ് ഓർഡർ ഇനി ഇങ്ങനെ തന്നെ
ഇന്ത്യൻ ടി20 ടീമിൽ സഞ്ജുവിന്റെ വിക്കറ്റ് കീപ്പർ സ്ഥാനത്തിന് ഭീഷണിയാകുമെന്ന് കരുതപ്പെടുന്ന മറ്റൊരു താരം ഇഷാൻ കിഷനാണ്. സൺ റൈസേഴ്സ് ഹൈദരാബാദിന്റെ താരമായ ഇഷാൻ ആദ്യ കളിയിൽ സെഞ്ചുറി നേടിയെങ്കിലും പിന്നീടുള്ള കളികളിൽ 0, 2 എന്നിങ്ങനെയാണ് സ്കോർ ചെയ്തത്. ഇന്ത്യയുടെ പ്രധാന വിക്കറ്റ് കീപ്പർമാർ സ്ഥിരതയോടെ കളിക്കുന്നതിൽ പരാജയമാകുന്നത് സഞ്ജു സാംസണ് ഗുണകരമാണ് എന്നതും ശ്രദ്ധേയം.
രചയിതാവിനെക്കുറിച്ച്ഗോകുൽ എസ്ഗോകുൽ എസ്- സമയം മലയാളത്തിൽ ഡിജിറ്റൽ കണ്ടൻ്റ് പ്രൊഡ്യൂസർ. സ്പോർട്സ് ഇഷ്ട വിഷയം. ഇന്ത്യൻ സൂപ്പർ ലീഗ്, സന്തോഷ് ട്രോഫി അടക്കം വിവിധ ടൂർണമെന്റുകൾ റിപ്പോർട്ട് ചെയ്തിട്ടു‌ണ്ട്. 2017 മുതൽ മാധ്യമ പ്രവർത്തന രംഗത്ത് സജീവം. ഇടക്കാലത്ത് അധ്യാപകനായും ജോലി ചെയ്തു.… കൂടുതൽ വായിക്കുക