ട്വിസ്റ്റോട് ട്വിസ്റ്റ്, അവിശ്വസനീയം അശുതോഷ്..! ഐപിഎല്‍ സൂപ്പര്‍ ത്രില്ലറില്‍ അവസാന ഓവറില്‍ ഡല്‍ഹിക്ക് ഒരു വിക്കറ്റ് ജയം

എല്‍എസ്ജിക്ക് വേണ്ടി നിക്കോളസ് പൂരന്‍, മിച്ചല്‍ മാര്‍ഷ് എന്നിവര്‍ നടത്തിയ വെടിക്കെട്ട് വിഫലമായി. പൂരന്‍ 30 പന്തില്‍ 75 റണ്‍സ് വാരിക്കൂട്ടിയപ്പോള്‍ മാര്‍ഷ് 36 പന്തില്‍ 72 റണ്‍സും അടിച്ചെടുത്തതോടെയാണ് മികച്ച വിജയലക്ഷ്യം കുറിച്ചത്.

210 റണ്‍സ് വിജയലക്ഷ്യം പിന്തുടര്‍ന്ന ഡിസിക്ക് ഇന്നിങ്‌സിലെ ആദ്യ ഓവറില്‍ തന്നെ രണ്ട് വിക്കറ്റുകള്‍ നഷ്ടമായി. പേസര്‍ ഷാര്‍ദുല്‍ താക്കൂര്‍ ആണ് ഇരട്ട പ്രഹരമേല്‍പ്പിച്ചത്. മൂന്നാം പന്തില്‍ ഓപണര്‍ ജെയ്ക് ഫ്രേസര്‍ മക്ഗുര്‍ക്കിനെ (1) യും അഞ്ചാം പന്തില്‍ അഭിഷേക് പോറെലിനെ (0) യും ആണ് ഷാര്‍ദുല്‍ താക്കൂര്‍ പുറത്താക്കിയത്.

രണ്ടാമത്തെ ഓവറില്‍ സമീര്‍ റിസ്‌വി കൂടി പുറത്തായതോടെ ഏഴ് റണ്‍സിന് മൂന്ന് വിക്കറ്റ് എന്ന നിലയിലേക്ക് കൂപ്പുകുത്തി. ഓപണര്‍ ഫാഫ് ഡുപ്ലെസിസും ക്യാപ്റ്റന്‍ അക്‌സര്‍ പട്ടേലും സ്‌കോര്‍ ബോര്‍ഡ് ചലിപ്പിക്കാനുള്ള ദൗത്യം ഏറ്റെടുത്തു. അക്‌സര്‍ 11 പന്തില്‍ 22 റണ്‍സുമായി പുറത്തായി. പിന്നാലെ ഡുപ്ലെസിസ് 18 പന്തില്‍ 29 റണ്‍സുമായി മടങ്ങി.

ട്രിസ്റ്റണ്‍ സ്റ്റബ്‌സും അഷുതോഷ് ശര്‍മയും ക്രീസിലെത്തിയതോടെ കളി മാറി. സ്റ്റബ്‌സ് 22 പന്തില്‍ 34 റണ്‍സ് നേടി. എന്നാല്‍ തുടര്‍ന്നെത്തിയ വിപ്രാജ് നിഗം ആണ് ഏവരെയും ഞെട്ടിച്ചത്. 15 പന്തില്‍ അഞ്ച് ബൗണ്ടറികളും രണ്ട് സിക്‌സറുകളും സഹിതം വിപ്രാജ് 39 റണ്‍സ് വാരിക്കൂട്ടി. അശുതോഷിനൊപ്പം വിപ്രാജ് കൂടി ചേര്‍ന്നതോടെ ഡല്‍ഹിക്കും വിജയിക്കാമെന്ന സ്ഥിതിയായി.

വിപ്രാജിനെ വീഴ്ത്തി ദിഗ്വേഷ് രാത്തി എല്‍എസ്ജിയെ വീണ്ടും കളിയിലേക്ക് തിരിച്ചുകൊണ്ടുവന്നു. ഇതോടെ ഉയര്‍ന്ന റണ്‍റേറ്റ് നിലനിര്‍ത്താന്‍ ഡിസി പാടുപെട്ടെങ്കിലും അഷുതോഷ് ഒരറ്റത്ത് നിലയുറപ്പിച്ചത് അവര്‍ക്ക് പ്രതീക്ഷ നല്‍കുന്നുണ്ടായിരുന്നു. അവസാന ഓവറിലെ മൂന്നാം പന്ത് സിക്‌സറിന് പറത്തിയാണ് ഒരു വിക്കറ്റ് മാത്രം ശേഷിക്കെ അശുതോഷ് അവിശ്വസനീയ വിജയമൊരുക്കിയത്. അഞ്ച് സിക്‌സും അത്ര തന്നെ ബൗണ്ടറുകളും അശുതോഷ് പായിച്ചു.

നേരത്തേ ടോസ് നഷ്ടപ്പെട്ട് ബാറ്റിങ് ആരംഭിച്ച എല്‍എസ്ജിക്ക് വേണ്ടി ഐദന്‍ മാര്‍ക്രമും മിച്ചല്‍ മാര്‍ഷും ഓപണ്‍ ചെയ്യാനെത്തി. അഞ്ചാം ഓവറിലെ നാലാം പന്തില്‍ മാര്‍ക്രം (13 പന്തില്‍ 15) പുറത്തായി. ഇതോടെ മാര്‍ഷും നിക്കോളസ് പൂരനും ക്രീസില്‍ ഒരുമിച്ചു. മാര്‍ഷ് ആണ് ആദ്യം പുറത്തായത്. അപ്പോഴേക്കും ടീം സ്‌കോര്‍ 11.4 ഓവറില്‍ രണ്ടിന് 133 എന്ന മികച്ച നിലയില്‍ എത്തിയിരുന്നു.

മാര്‍ഷ് ആറ് സിക്‌സറുകളും അത്ര തന്നെ ബൗണ്ടറികളും പായിച്ചാണ് 72 റണ്‍സ് നേടിയത്. മാര്‍ഷിന്റെ സ്‌ട്രൈക്ക് റേറ്റ് 200 ആണെങ്കില്‍ അതിനേക്കാള്‍ മികച്ചതായിരുന്നു പൂരന്റെ പ്രകടനം. ഏഴ് സിക്‌സറുകളും ആറ് ബൗണ്ടറികളും സഹിതം വെറും 30 പന്തില്‍ 250 സ്‌ട്രൈക്ക് റേറ്റില്‍ 75 റണ്‍സാണ് അദ്ദേഹം നേടിയത്.

അതേസമയം, എല്‍എസ്ജിയെ ആദ്യമായി നയിക്കാനെത്തിയ ഋഷഭ് പന്തിന് അക്കൗണ്ട് തുറക്കാനായില്ല. ആറ് പന്തുകള്‍ നേരിട്ട ശേഷമാണ് ഡക്കായത്. ഡേവിഡ് മില്ലെര്‍ 19 പന്തില്‍ 27 റണ്‍സ് നേടി പുറത്താവാതെ നിന്നു.